कास्ट्राईब संघटनेतर्फे राजर्षी शाहू ग्रंथांचे वाटप

आबलोली : कास्ट्राईब शिक्षक संघटना महाराष्ट्र राज्य तालुका शाखा, गुहागरतर्फे छत्रपती शाहू महाराज यांच्या जीवनावरील ग्रंथांचे वाटप करण्यात आले. महाराजांच्या पुरोगामी विचारांचा वारसा समाजात पोहोचविण्याचा प्रयत्न या उपक्रमातून करण्यात आला.

यावेळी रत्नागिरी जिल्हा परिषदेचे माजी अध्यक्ष महेश नाटेकर, गुहागर पंचायत समितीच्या सभापती पूर्वी निमुणकर, पंचायत समिती सदस्य रवींद्र आंबेकर, तहसीलदार लता धोत्रे, गटशिक्षणाधिकारी वामन जगदाळे, शिवसेनेचे तालुकाप्रमुख सचिन बाईत, रिपाइंचे अध्यक्ष सुरेश सावंत रत्नागिरी, शिक्षण विस्तार अधिकारी लीना भागवत, ओबीसी संघर्ष समितीचे अध्यक्ष पांडुरंग पाते, माजी सरपंच नरेश निमुणकर या प्रमुख व्यक्तींसह विद्यार्थ्यांना ग्रंथांचे वाटप करण्यात आले. कास्ट्राईब शिक्षक संघटना ही नेहमीच महापुरुषांची विचारधारा विद्यार्थ्यांबरोबर समाजात पोहोचविण्यासाठी नेहमी कार्यरत असते. या संघटनेतर्फे वेगवेगळे सामाजिक उपक्रम राबवले जात असल्याचे जिल्हा परिषद सदस्य महेश नाटेकर यांनी सांगितले.

संघटनेचे तालुकाध्यक्ष सुहास गायकवाड यांनी शाहू महाराजांचे विचार शक्य तितक्या व्यक्तींपर्यंत पोहोचविण्यासाठी ग्रंथभेट हा उपक्रम राबवला गेल्याचे सांगितले. या उपक्रमाच्या यशस्वितेसाठी जिल्हा उपाध्यक्ष सिद्धार्थ जाधव, तालुक्याचे कार्याध्यक्ष सुधीर कांबळे, सचिव प्रकाश गोरे, कोषाध्यक्ष सुहास जाधव, सहसचिव वैभव पवार यांच्यासह सर्व सदस्यांनी प्रयत्न केले.