कोरोनाचे रुग्ण बरे

दापोली : शुक्रवार, २ जुलैपर्यंत दापोलीतील ८९ टक्के रुग्णांनी कोरोनावर मात केली असून, ४ टक्के रुग्णांनी प्राण गमावल्याचे दापोली आरोग्य विभागाकडून सांगण्यात आले. दापोलीत एकूण ४ हजार १९६ रुग्ण सापडले. यातील ३ हजार ७७० रुग्ण बरे होऊन घरी गेले आहेत. सध्या २४८ रुग्ण उपचार घेत आहेत तर आतापर्यंत १७८ रुग्णांचा मृत्यू झाला आहे.

हद्दवाढीला अंतिम मंजुरी

दापोली : दापोली नगर पंचायतीच्या ऑनलाईन झालेल्या मासिक सर्वसाधारण सभेत नगर पंचायत हद्दवाढीला अंतिम मंजुरी देण्यात आली. यामुळे नगर पंचायतीची हद्दवाढ आता निश्चित मानली जात आहे. या सभेत काळकाई मंदिर सभामंडप, मेहता पेट्रोल पंपाजवळील जागा सुशोभिकरणाला परवानगी देण्यासह विविध विकासकामांना मंजुरी देण्यात आली.

रस्ता अपूर्णच

रत्नागिरी : रत्नागिरीत विकसित होत असलेल्या विमानतळाकडे रत्नागिरीहून मजगावकडे जाण्यासाठी एमआयडीसीतून रस्ता तयार करण्यात येत आहे. या रस्त्याचे काम अजूनही अपूर्णावस्थेत असून, त्यावर डांबराचे दोन थर मारले जाऊन तो पक्का केला जाणार असल्याचे उद्योजक रवींद्र सामंत यांनी सांगितले. केवळ महिन्याभरातच या मार्गाची वाताहात झाल्याची बाब परिसरातील ग्रामस्थांच्या निदर्शनाला आली. या कामात गोलमाल तर झालेले नाही ना, अशा शंकाही ग्रामस्थांनी उपस्थित केल्या.

रेनकोट वाटप

दापोली : महाराष्ट नवनिर्माण सेनेचे राज्य सरचिटणीस व खेडचे नगराध्यक्ष वैभव खेडेकर यांच्यातर्फे दापोली पोलीस स्थानकातील कर्मचाऱ्यांना रेनकोटचे वाटप करण्यात आले. सहाय्यक पोलीस निरीक्षक पूजा हिरमेठ यांच्याकडे रेनकोट सुपूर्द करण्यात आले. यावेळी मनसे उपजिल्हाध्यक्ष सचिन गायकवाड, नितीन साठे, पदाधिकारी व कार्यकर्ते उपस्थित होते.

डाॅक्टर व शेतकरी दिन

दापोली : दापोली लायन्स क्लबतर्फे जागतिक ‘डाॅक्टर्स डे’निमित्त डाॅक्टर्स, सी. ए. व शेतकऱ्यांना पुष्पगुच्छ देऊन शुभेच्छा देण्यात आल्या. यावेळी अनेक लायन्स सदस्य उपस्थित होते.

कृषीने साधला संवाद

मंडणगड : कृषी संजीवनी सप्ताहांतर्गत तालुका कृषी कार्यालयाच्या माध्यमातून तालुक्यातील विविध गावातील शेतकऱ्यांशी संवाद साधत विविध योजनांबाबत मार्गदर्शन करण्यात आले. तालुक्यातील आंबवली, साखरी, वेळास, बाणकोट, धामणी, गोठे, नारगोली गावातील शेतकऱ्यांना कृषीच्या विविध योजनांची माहिती देण्यात आली. यावेळी कृषी शास्त्रज्ञ डाॅ. विनय मोरे, तालुका कृषी अधिकारी सुप्रिया घोडके व अधिकाऱ्यांनी शेतकऱ्यांच्या शंकांचे निरसन केले.

ऑनलाईन बैठक

मंडणगड : राष्टवादी काँग्रेसच्या दापोली, खेड व मंडणगड तालुक्यातील महिला व युवती संघटनेच्या पदाधिकाऱ्यांशी जिल्हा व वरिष्ठ स्तरावरील कार्यकर्त्यांनी नुकताच ऑनलाईन बैठकीव्दारे संवाद साधला. यावेळी कोमल चव्हाण यांची दापोली तालुका उपाध्यक्षपदी नेमणूक करण्यात आली.

कोविड सेंटरचे उद्घाटन

दापोली : दापोली तालुक्यातील गिम्हवणे ग्रामपंचायतीतर्फे ३० बेडच्या कोविड सेंटरचा शुभारंभ आमदार योगेश कदम यांच्या हस्ते करण्यात आला. यावेळी प्रांताधिकारी शरद पवार, तहसीलदार वैशाली पाटील तसेच शिवसेनेचे पदाधिकारी व कार्यकर्ते उपस्थित होते.

कोविड सेंटरचे आज लोकार्पण

खेड : माजी आमदार संजय कदम यांच्या संकल्पनेतून चिंचघर - वेताळवाडी येथे १०० बेडचे कोविड सेंटर उभारले आहे. ४ जुलै रोजी दुपारी १२ वाजता खासदार सुनील तटकरे, शास्त्रज्ञ डाॅ. दिलीप पवार यांच्या उपस्थितीत लोकार्पण होणार आहे. हा कार्यक्रम एस. एम. इंग्लिश स्कूल व कनिष्ठ महाविद्यालय येथे होणार आहे. यावेळी जिल्हाधिकारी लक्ष्मीनारायण मिश्रा, मुख्य कार्यकारी अधिकारी डाॅ. इंदुराणी जाखड, आमदार शेखर निकम उपस्थित राहणार आहेत.

कडक लाॅकडाऊन

गणपतीपुळे : मालगुंडमध्ये कोरोना रुग्णांची संख्या वाढत असून, परिसर कन्टेनमेंट झोन म्हणून घोषित करण्यात आला आहे. मालगुंडमध्ये प्रत्येक वाडीमध्ये जाणारा रस्ता बंद करण्यात आला असून, बाहेरुन येणाऱ्या सर्वांना बंदी घालण्यात आली आहे. पोलीस बंदोबस्तसुद्धा ठेवण्यात आला आहे.