जावडे - कातळगाव रस्त्याची दुरवस्था

लांजा : तालुक्यातील जावडे ते कातळगाव येथील जिल्हा परिषदेच्या चार किलोमीटर रस्त्याची दुरवस्था झाल्याने परिसरातील एक हजार ग्रामस्थांना नाहक त्रास सहन करावा लागत असल्याने वंचित बहुजन आघाडीतर्फे तहसीलदार समाधान गायकवाड यांना निवेदन देण्यात आले.

या निवेदनात म्हटले आहे की, इसवली - पाथरवाडी या जिल्हा परिषदेच्या रस्ता क्रमांक ६४ पासून जावडे ते कातळगाव हा जोडरस्ता ४ किलोमीटर आहे. या रस्त्याला जिल्हा परिषदेकडे वर्ग करून २० वर्षे पूर्ण झाली आहेत. गेली अनेक वर्षे या रस्त्याकडे जिल्हा परिषदेने दुर्लक्ष केल्याने रस्त्याची दुरवस्था झाली आहे. पावसाळ्यात हा रस्ता पाण्याने वाहून जात असल्याने एस. टी. सेवाही बंद करण्यात येते. ग्रामस्थांनी श्रमदान करुन या रस्त्याची डागडुजी केल्यानंतर एस. टी. सेवा सुरु केली जाते. येथील ग्रामस्थांनी संबंधित विभाग, लोकप्रतिनिधी यांच्याकडे पत्रव्यवहार करूनही त्याची दखल घेतली जात नसल्याने ग्रामस्थांना नाहक त्रास सहन करावा लागत आहे. हे निवेदन वंचित बहुजन आघाडीचे जिल्हा सदस्य दीपक पवार, संतोष जाधव, निखिल कांबळे यांनी दिले.

-----------------------------

लांजा तालुक्यातील जावडे - कातळगाव रस्त्याच्या दुरवस्थेबाबत वंचित बहुजन आघाडीतर्फे लांजाचे तहसीलदार समाधान गायकवाड यांना निवेदन देण्यात आले.