मुंबई : नवीन सरकार येऊन 100 दिवस उलटले असूनही गेल्या सरकारमध्ये असलेल्या मंत्र्यांनी आपले बंगले सोडले नसल्याने राष्ट्रवादीच्या खासदार सुप्रिया सुळे यांनी नाराजी व्यक्त करत भाजपवर निशाणा साधला. सरकार येऊन 100 दिवस झाले पण आमच्या भावाला अजूनही बंगलाच मिळाला नाही. तर एरवी आम्हाला तत्वज्ञान शिकवणाऱ्यांनी बंगलेच सोडले नसल्याचा खोचक टोला त्यांनी भाजपला लगावला.
रोहा येथे आयोजित करण्यात आलेल्या राष्ट्रवादी पक्षाच्या जिल्हा मेळाव्यात बोलताना सुप्रिया सुळे म्हणाल्यात की, उपमुख्यमंत्री अजीत पवार यांना मंत्रालयात भेटायचं असेल तर ते अशक्य आहे. एकतर अजित पवार हे सकाळी 7 वाजताच मंत्रालयात जातात. दरवाजे उघडणाऱ्यांच्या आधी दादा तिथे पोहचतात. त्याचं कारण म्हणजे, आमच्या भावाला अजूनही बंगलाच मिळाला नसल्याचं सुप्रिया सुळे म्हणाल्यात.
सरकार येऊन 100 दिवस झाले पण 'दादा'ला घर मिळाला नसल्याचं म्हणत सुप्रिया सुळे यांनी यावेळी भाजपवर टीका केली. आम्हाला तत्वज्ञान शिकवणारे बंगले सोडायला तयार नाही, त्यामुळे आमच्या मंत्र्यांना बंगलेच मिळत नसल्याचं म्हणत सुप्रिया सुळे यांनी नाराजी व्यक्त केली.
भाजपा सरकारच्या काळात माजी अर्थमंत्री सुधीर मुनगंटीवार यांना मलबार हिल येथील देवगिरी बंगला राहण्यासाठी दिला होता. नवीन सरकार आल्यापासून १०० दिवस झाले तरी मुनगंटीवारांनी अद्याप देवगिरी बंगला रिकामा केला नाही. त्यामुळे अजित पवार सध्या चर्चगेटच्या एका इमारतीत वास्तव्यास आहेत.