लोकमत न्यूज नेटवर्कमुंबई : ट्रॉम्बेतून रायगडच्या तरुणांकडून ३० लाख किंमतीचा ६ किलो चरसचा साठा जप्त करण्यात ट्रॉमबे पोलिसांना यश आले आहे. नदिम मो. इद्रिस शाह (३०) आणि त्याचा मित्र अक्षय वाघमारे अशी अटक करण्यात आलेल्या तस्करांची नावे आहे.
ट्रॉम्बे पोलिसांनी दिलेल्या माहितीनुसार, काही जण ड्रग्ज विक्रीसाठी येणार असल्याची माहिती पथकाला मिळाली. त्यानुसार पथकाने सापळा रचून १ किलो ५९८ ग्रॅम वजनाचा अंदाजे ७,९९,००० रुपये किमतीचा 'चरस' जप्त केला. त्याच्या चौकशीत उरणचा मित्र मित्र नामे अक्षय लक्ष्मण वाघमारेकडे आणखीन ड्रग्ज साठा असल्याची माहिती मिळाली. त्यानुसार, पोलिसांनी अक्षयलाही अटक केली. त्याच्याकडून जवळपास ४ किलो ४४७ ग्रॅम वजनाचा अंदाजे २२,२३,००० किमतीचा 'चरस हस्तगत करण्यात आला.
दोघांविरुद्ध गुन्हा नोंदवत त्यांच्यावर अटकेची कारवाई करण्यात आली आहे. परिमंडळ ६ अंतर्गत आतापर्यंत ११५ गुन्हे नोंदवत १४४ आरोपीना अटक केली आहे. त्यांच्याकडून जवळपास दीड कोटींचे ड्रग्ज जप्त केले आहे.