नारायणगाव (पुणे) : नारायणगाव येथील हॉटेल गॅलेक्सी समोर देशी बनावटीच्या पिस्तुलाचा धाक दाखवून दहशत निर्माण करणाऱ्या इसमाला नारायणगाव पोलिस स्टेशन व स्थानिक गुन्हे शाखा पुणे ग्रामीणच्या पथकाने जेरबंद केले आहे, अशी माहिती नारायणगाव पोलिस स्टेशनचे सहायक पोलिस निरीक्षक महादेव शेलार यांनी दिली. पवन दत्तात्रय शेजवळ (वय ३७), रा. शिव-विहार सोसायटी, नारायणगाव, ता. जुन्नर, जि. पुणे यास पोलिसांनी अटक केली आहे.
नारायणगाव पोलिस स्टेशन हद्दीत हॉटेल गॅलेक्सीसमोर नारायणगाव जुन्नर रोडवर पवन शेजवळ हा आपल्या कब्जातील गावठी बनावटीचे पिस्तूल दाखवून दहशत निर्माण करत आहे, अशी गुप्त बातमीदारामार्फत बातमी मिळाल्याने नारायणगाव पोलिस स्टेशनचे प्रभारी अधिकारी सपोनि शेलार यांच्या मार्गदर्शनाखाली पोलिस उपनिरीक्षक सनील धनवे, पो. कॉ. सचिन सातपुते, पो.ना. मंगेश लोखंडे, पो. कॉ. हासे स्था.गु. शा. पुणे ग्रामीणचे पो.हवा. दीपक साबळे, पो.ना. संदीप वारे, पो. कॉ. अक्षय नवले यांनी लागलीच घटनास्थळी जाऊन खात्री केली असता शेजवळ हा आपल्या कब्जातील गावठी बनावटीचे एक पिस्तूल विनापरवाना बेकायदा बाळगून नागरिकांना धाक दाखवून दहशत निर्माण करत असल्याचे दिसल्याने पोलिस स्टाफने त्यास शिताफीने ताब्यात घेतले. पुढील तपास पोहवा रमेश काठे करत आहेत.