- अविनाश थोरातपुणे - बारामती लोकसभा मतदारसंघातील २०१४ ची निवडणूक ऐतिहासिक ठरली. प्रथमच दौंड, खडकवासला आणि पुरंदर मतदारसंघात राष्ट्रवादी कॉँग्रेस मागे पडली. राष्ट्रवादी कॉँग्रेसच्या उमेदवार सुप्रिया सुळे यांनी बारामती, इंदापूर आणि भोर विधानसभा मतदारसंघात घेतलेल्या आघाडीनेच त्यांना तारले. भारतीय जनता पक्ष- शिवसेना पुरस्कृत राष्ट्रीय समाज पक्षाचे उमेदवार महादेव जानकर बारामती विधानसभा मतदारसंघातून तब्बल ९०,६२८ मतांनी पिछाडीवर गेल्याने सुळे यांचा विजय सोपा झाला.गेल्या लोकसभा निवडणुकीत सुप्रिया सुळे यांना ५,२२,५६२ मते मिळाली. जानकर यांनी ४,५१,८४३ मते घेतली. सुळे यांचा ६९,७१९ मतांनी विजय झाला. आम आदमी पक्षाचे सुरेश खोपडे यांना २६,३९६ मते मिळविली होती. बहुजन समाज पक्षाचे काळूराम चौधरी यांनी २४,९०८ मते मिळविली होती.बारामतीची आघाडीच ठरली निर्णायक बारामती विधानसभा मतदारसंघानेच सुप्रिया सुळे यांचा विजय सोपा केला. सुळे यांना १,४२,६२८ मते मिळाली होती. जानकर यांनी ५२,००० मते घेतली. बारामतीचे आमदार तत्कालिन उपमुख्यमंत्री अजित पवार होते. याशिवाय शरद पवार, अजित पवार यांच्यासह संपूर्ण पवार कुटुंबीय ठाण मांडून होते. तरीही या मतदारसंघातील अनेक गावांत राष्टÑवादी कॉँग्रेसपेक्षा रासपने जास्त मते मिळविली होती. बारामतीचे मूळ रहिवासी असलेल्या खोपडे यांनी ३,२३९ मते मिळविली.इंदापूर मतदारसंघात आघाडी धर्माचे पालनइंदापूर विधानसभा मतदारसंघात कॉँग्रेसचे तत्कालिन सहकार मंत्री हर्षवर्धन पाटील आमदार होते. याशिवाय या मतदारसंघात राष्टÑवादी कॉग्रेसचेही चांगले जाळे होते. सुरूवातीला कॉँग्रेस- राष्टÑवादीत मनोमिन होते का? याबाबत शंका होती. मात्र, इंदापूरने सुळे यांना साथ दिली. त्यांना ८७,१८५ मते मिळाली. जानकर यांनी ६५,४९२ मते मिळविली. इंदापूरमधून सुळे यांना २१, ६९३ मतांची आघाडी मिळविली.भोर- वेल्हा-मुळशीनेही सावरलेभोर-वेल्हा-मुळशी मतदारसंघातही कॉँग्रेसचे आमदार संग्राम थोपटे आमदार होते. पवार- थोपटे वादाच्या पार्श्वभूमीवर भोरमधील राष्ट्रवादीच्या कामगिरीबाबत उत्सुकता होती. मात्र, भोर मतदारसंघानेही सुप्रिया सुळे यांना १६,८८५ मतांची आघाडी दिली. सुळे यांना ९०,९१५ तर जानकर यांना ७४,०४० मते मिळाली.दौंडने दिला राष्ट्रवादीला झटकादौंड विधानसभा मतदारसंघ ऐकेकाळचा राष्ट्रवादी कॉँग्रेसचा बालेकिल्ला. मात्र, येथील कुल-थोरात गटांच्या वादात पक्षीय धृ्रवीकरण झाले. राहुल कुल यांनी त्यावेळी राष्ट्रीय समाज पक्षामध्ये थेट प्रवेश केला नव्हता. मात्र, जानकर यांच्यासोबत होते. त्यामुळे राष्ट्रवादी कॉँग्रेसला दौंडमध्ये प्रथमच झटका बसला. सुप्रिया सुळे दौंड विधानसभा मतदारसंघातून २५,५४८ मतांनी पिछाडीवर राहिल्या. महादेव जानकर यांना ८२,८३७ तर सुप्रिया सुळे यांना ५७,२८९ मते मिळाली.यंदाच्या निवडणुकीत पुलाखालून बरेच पाणी वाहून गेले आहे. महादेव जानकर पुन्हा बारामतीतून लढणार का? हा प्रश्न आहे. त्यामुळे भारतीय जनतापक्ष- शिवसेना आघाडीचा कोण उमेदवार येणार, याबाबत उत्सुकता आहे. एखादी ‘सेलिब्रिटी’ येथून लढविण्याचा भाजपाचा विचार असल्याचीही चर्चा आहे. हे झाले तर निवडणूक चुरशीची होईल. या पार्श्वभूमीवर विधानसभा मतदारसंघातील दोन्ही पक्षांच्या सुभेदारांची जबाबदारी वाढली आहे. पुढच्या वेळी होणाऱ्या विधानसभा निवडणुकांतील समीकरणेही या निवडणुकीतून जुळली जाणार आहेत.पुरंदरमध्येही राष्ट्रवादी मागेपुरंदर विधानसभा मतदारसंघात पुणे शहराचा बराचसा भाग जोडला आहे. या ठिकाणी राष्ट्रवादीला मोठा फटका बसला. त्याचबरोबर तालुक्यातील राजकारणात पक्षाचे कार्यकर्ते विखुरले गेले होते. एकेकाळी राष्ट्रवादी कॉँग्रेसमध्ये असणारे विजय शिवतारे यांनी शिवसेनेत प्रवेश केला होता. कॉँग्रेसचे संजय जगताप यांचेही राष्ट्रवादीकाँग्रेसशी फारसे मधुर संबंध नव्हते. त्यामुळे पुरंदरमधूनही सुप्रिया सुळे ५,६६६ मतांनी मागे पडल्या. सुळे यांना ७२,४३१ मते मिळाली. जानकर यांनी ७८,०९७ मते मिळवून आघाडी घेतली.खडकवासल्यात इतिहास घडला असता...पणखडकवासला विधानसभा मतदारसंघात बहुतांश शहरातील भाग येतो. या मतदारसंघात सुुप्रिया सुळे यांना प्रयत्नांची शिकस्त करावी लागली. तरीही खडकवासल्याने जानकर यांना तब्बल २८,१२७ मतांची आघाडी दिली. जानकर यांना ९८,७२९ मते मिळाली. सुळे यांना ७०,६०२ मते मिळाली होती. जानकर यांनी राष्ट्रीय समाज पक्षाच्या चिन्हावर न लढता भारतीय जनता पक्षाचे कमळ हे चिन्ह घेतले असते तर कदाचित खडकवाल्याने इतिहास घडविला असता, अशीही चर्चा त्यावेळी रंगली होती.
सुभेदारांचीच परीक्षा : सुळेंना फक्त बारामतीच तारणार का?
By ऑनलाइन लोकमत | Updated: March 23, 2019 01:04 IST