एफडीओ कार्यालयावर सीसी टीव्हीचा वॉच

अन्नधान्य पुरवठा विभागाची शहरातील सर्व परिमंडळ कार्यालये सीसी टीव्हीच्या नजरेत येणार आहेत. परिमंडळ कार्यालयातील एजंटगिरीला आळा घालण्यासाठी तसा प्रस्ताव करण्यात आला

पुणे : अन्नधान्य पुरवठा विभागाची शहरातील सर्व परिमंडळ कार्यालये सीसी टीव्हीच्या नजरेत येणार आहेत. परिमंडळ कार्यालयातील एजंटगिरीला आळा घालण्यासाठी तसा प्रस्ताव करण्यात आला असल्याची माहिती अन्न पुरवठा अधिकारी (एफडीओ) धनाजी पाटील यांनी दिली. येरवडा, निगडी, मंडई, आंबिलओढा येथील कार्यालयांत प्रत्येकी एक व शिवाजीनगर गोदामातील चार परिमंडळ कार्यालयांत सीसी टीव्ही बसविण्यात येणार आहे. तज्ज्ञांच्या मदतीने त्याचे ठिकाण निश्चित करण्यात येईल. कार्यालयाच्या परिसराबरोबर कार्यालयातदेखील कॅमेरा बसविण्यात येणार आहे. एजंटांचा सुळसुळाट वाढल्याने हा निर्णय घेण्यात आल्याचे पाटील यांनी सांगितले. नवीन शिधापत्रिका काढणे, जुने कार्ड बदलून नवीन घेणे, शिधापत्रिकेत नवी नावे जोडणे अथवा नावे कमी करण्यासाठी नागरिकांना परिमंडळ कार्यालयाचा आसरा घ्यावा लागतो. ही कामे महा ई-सेवा केंद्राच्या माध्यमातूनही होत आहेत. मात्र, कामे जलद करून देण्यासाठी एजंटांची एक साखळीच सर्व परिमंडळ कार्यालयात कार्यरत असल्याचे उघड गुपित आहे. एजंटांशिवाय कोणतेही काम होत नसल्याचे चित्र असून, तशा काही तक्रारीदेखील एफडीओ कार्यालयाकडे दाखल झालेल्या आहेत. तसेच, लोकसभा निवडणुकीच्या मतदानापूर्वी ‘ह’ परिमंडळ कार्यालयातून बोगस शिधापत्रिका दिल्याचा प्रकारदेखील ‘लोकमत’ने उघडकीस आणला होता. त्याची गंभीर दखल घेऊन निवडणूक आयोगानेदेखील मतदान बूथवर ओळखपत्र म्हणून शिधापत्रिका ग्राह्य धरू नये, असा निर्णय घेण्यात आला होता. एफडीओ कार्यालयाने या प्रकरणी संबंधित अधिकार्‍याची चौकशी सुरू केली आहे. यापूर्वीदेखील शिवाजीनगर, येरवडा व आंबिलओढा अशा कार्यालयांत एजंटांचा सुळसुळाट असल्याच्या तक्रारी दाखल झाल्या आहेत. यापूर्वीचे एफडीओ ज्ञानेश्वर जवंजाळ यांनीदेखील शिवाजीनगर गोदामातील परिमंडळ कार्यालयातील एजंटांना हटवावे, अशी मागणी पोलिसांकडे केली होती. तर, शहराला दहशतवादी हल्ल्याचा धोका आहे. काही संशयित दहशतवाद्यांकडे बोगस शिधापत्रिका आढळून आल्या आहेत. त्यामुळे शिधापत्रिका काढण्यास येणार्‍या संशयित व्यक्तींची नावे कळवावीत, असे पत्र गेल्या वर्षी पोलिसांनी एफडीओ कार्यालयाला दिले होते. या घटनांच्या पार्श्वभूमीवर एजंटगिरीला आळा घालण्यासाठी सीसी टीव्हीची मदत घेण्यात येत आहे. (प्रतिनिधी)