‘ते’ तीन महिने ठरले उच्चांकी

कोरोनाचे नऊ महिने

लोकमत न्युज नेटवर्क

पुणे : राज्यातील कोरोनाचा पहिला रुग्ण पुण्यात आढळल्यानंतर सर्वत्र घबराट पसरली. त्यानंतर दिवसागणिक नवीन रुग्ण व मृत्युचा आकडा वाढतच गेला. जुलै, ऑगस्ट व सप्टेंबर हे तीन महिने पुण्याच्यादृष्टीने काळजीचे ठरले. या तीन महिन्यातच दररोज दीड हजाराच्या सरासरीने जवळपास सव्वा लाख नवीन रुग्ण आढळले. तर कोरोनाने या कालावधीतच तब्बल तीन हजार जणांचा बळी घेतला. गंभीर रुग्णांना ऑक्सिजन व व्हेंटिलेटर खाट मिळणेही कठीण झाले होते. ऑक्टोबर महिन्यापासून मात्र पुणेकरांना दिलासा मिळत गेला.

चीनमध्ये कोरोनाचा कहर सुरू झाल्यानंतर जानेवारी महिन्यापासूनच पुण्यात नायडू रुग्णालयामध्ये परदेशी प्रवाशांच्या तपासणीची सोय करण्यात आली. दि. ८ मार्च पर्यंत झालेल्या सुमारे १०० जणांच्या तपासण्यांमध्ये एकही प्रवासी बाधित आढळून आला नाही. राज्यातही हीच स्थिती होती. पण दि. ९ मार्च रोजी होळीच्या दिवशी सायंकाळी दुबईतून आलेल्या पती-पत्नीला कोरोनाचा विळखा पडल्याचा अहवाल राष्ट्रीय विषाणु संस्थेने (एनआयव्ही) दिला. हे दोघे महाराष्ट्रातील पहिले कोरोनाबाधित ठरले. त्या रात्रीपासून पुणेकरांची अक्षरश: झोप उडाली. आरोग्य विभाग, जिल्हा प्रशासन सतर्क झाली. दोघे राहत असलेल्या सोसायटीसह जवळच्या परिसरात जणु आणीबाणीची परिस्थती निर्माण झाली होती.

त्यानंतर २० मार्चला कोणत्याही परदेश प्रवासाची पार्श्वभूमी नसलेली ४१ वर्षीय अंगणवाडी सेविका बाधित असल्याचे समोर आले. त्यामुळे संपुर्ण आरोग्य यंत्रणा हादरून गेली. ही सामुहिक संसर्गाची सुरूवात झाल्याची भिती व्यक्त होऊ लागली. त्यानंतर पुढील महिनाभरात पुण्यात १८२ बाधित रुग्ण आढळले. भवानी पेठ, गंज पेठ, रास्ता पेठ, कसबा पेठ यांसह शहराच्या अन्य काही भागात रुग्णसंख्या वेगाने वाढत गेली. जुलै महिन्यापासून ही वाढ हाताबाहेर जाऊ लागली. पुढील तीन महिने कोरोनाने शहरात जणू धुमाकुळ घातला. ऑक्टोबरनंतर यात सुधारणा होत गेली.

-----------------

मागील नऊ महिन्यांतील स्थिती

दिवस एकुण चाचण्या एकुण बाधित एकुण मृत्यू बरे झालेले

९ मार्च ११२ ०२ ०० ००

९ एप्रिल १,८१५ १८२ २१ ६२

९ मे २१,८१३ २,३८० १४० ८२६

९ जुन ६२,४९५ ८,२०५ ४०३ ५,३०४

९ जुलै १,५०,६२८ २५,१७४ ७८६ १५,५७९

९ ऑगस्ट ३,१९,५८८ ६५,९६६ १,५४० ४८,६१४

९ सप्टेंबर ५,०७,८६६ १,११,९१६ २,६२५ ९२,६१४

९ ऑक्टोबर ६,६८,९३१ १,५२,८९७ ३,७८६ १,३५,३७५

९ नोव्हेंबर ७,५६,४९४ १,६३,४३४ ४,३४८ १,५४,१२८

८ डिसेंबर

----------------------------------------------------------------------