पुणे : जिल्ह्यातील तीन लोकसभा मतदारसंघांत झालेल्या मतदानाची पडताळणी पूर्ण झाल्यानंतर एकूण मतदान ५३.५४ टक्के; तर शिरूर मतदारसंघात ५४.१६ टक्के मतदान झाल्याची माहिती जिल्हाधिकारी तथा जिल्हा निवडणूक अधिकारी डॉ. सुहास दिवसे यांनी दिली. त्यामुळे पुणे मतदारसंघात गेल्या वेळच्या तुलनेत सुमारे चार टक्क्यांची वाढ झाली. शिरूरमध्ये सव्वापाच टक्क्यांची घट झाली आहे.
पुणे लोकसभा मतदारसंघात सोमवारी (दि. १३) मतदान पार पडले. त्यात ५१.२५ टक्के मतदान झाल्याची माहिती या मतदारसंघाचे निवडणूक निर्णय अधिकारी डॉ. सुहास दिवसे यांनी दिली होती. मात्र, यात बदल होऊ शकतो, अशी शक्यताही त्यांनी वर्तवली होती. मतदानानंतर २४ तासांमध्ये झालेल्या मतदानाची पुनर्पडताळणी केल्यानंतर अंतिम आकडा कळविण्यात आला आहे. त्यानुसार पुणे मतदारसंघात ५३.५४ टक्के मतदान झाले आहे.
मागील निवडणुकीत अर्थात २०१९ मध्ये पुण्यात ४९.८७ टक्के मतदान झाले होते. यंदा मतदानात ३.६७ टक्क्यांची वाढ झाली आहे. निवडणूक निर्णय अधिकाऱ्यांनी दिलेल्या आकडेवारीनुसार एकूण मतदान ११ लाख ३ हजार ६७८ झाले असून, त्यात ५ लाख ८४ हजार ५११ पुरुष; तर ५ लाख १९ हजार ७८ महिला व ८९ तृतीयपंथींनी मतदानाचा हक्क बजावला. यात ९ लाख ५७ हजार ५९८ मतदारांनी कर्तव्य बजावले नसल्याचे स्पष्ट झाले आहे.
सर्वाधिक २ लाख ४१ हजार ८१७ मतदार वडगावशेरीतील असून, सर्वात कमी १ लाख ४१ हजार १३३ मतदार शिवाजीनगरमधील आहेत. कोथरूडमध्ये २ लाख १७ हजार ४५५, पर्वतीत १ लाख ८९ हजार १८४, पुणे कॅन्टोन्मेंटमध्ये १ लाख ४९ हजार ९८४ आणि कसबा पेठ मतदारसंघात १ लाख ६४ हजार १०५ मतदारांनी मतदान केले.
शिरूर मतदारसंघात एकूण ५४.१६ टक्के मतदान झाले असून, मागील निवडणुकीत ५९.४४ टक्के मतदान झाले होते. त्यामुळे यंदा एकूण मतदानात ५.२८ टक्क्यांची घट झाली आहे. या ठिकाणी १३ लाख ७५ हजार ९३५ मतदारांनी मतदान केले, तर ११ लाख ६४ हजार १६९ मतदारांनी मतदान केले नाही. येथे ७ लाख ७३ हजार ९६९ पुरुष, ६ लाख १ हजार ५९१ महिला व ३३ तृतीयपंथींनी मतदानाचा हक्क बजावला. एकूण मतदान केलेल्यांमध्ये सर्वाधिक २ लाख ७७ हजार ६४५ मतदार हडपसरमध्ये; तर सर्वात कमी १ लाख ८१ हजार ५८४ मतदार जुन्नरमध्ये झाले. आंबेगावात १ लाख ९० हजार १७९, खेड आळंदीत २ लाख ३ हजार ६७०, शिरूरमध्ये २ लाख ४९ हजार ९७६, भोसरीत २ लाख ७२ हजार ५३९ मतदारांनी मतदान केले आहे.
पुणे मतदारसंघातील मतदान
विधानसभा -- पुरुष -- महिला --तृतीयपंथी -- एकूण --टक्के
वडगावशेरी १,३२,०७०--१,०९,७१९--२९--२,४१,८१७--५१.७१
शिवाजीनगर ७३,७९५--६७,३२३--१५--१,४१,१३३--५०.६७
कोथरूड १,१४,४५१--१,०३,०००--४--२,१७,४५५--५२.४३
पर्वती ९९,२९८--८९,८७१--१५--१,८९,१८४--५५.४७
पुणे कॅन्टोन्मेंट ७८,८२४--७१,१४९--११--१,४९,९८४--५३.१३
कसबा पेठ ८६,०७३--७८,०१७--१५--१,६४,१०५--५९.२४
एकूण ५,८४,५११--५,१९,०७८--८९--११,०३,६७८--५३.५४
शिरूरमधील मतदान
विधानसभा -- पुरुष -- महिला --तृतीयपंथी-- एकूण --टक्के
जुन्नर १,००,४२७ --८१,१५६-- १- १,८१,५८४-- ५८.१६
आंबेगाव १,०५,१५०-- ८५,०२४ --५--१,९०,१७९ --६२.९५
खेड-आळंदी १,१६,१३२-- ८७,५३६-- २--२,०३,६७०-- ५७.७६
शिरूर १,४१,६८२ --१,०८,२८९-- ५--२,४९,९७६-- ५६.९१
भोसरी १,५५,७९३-- १,१६,७३८-- ८--२,७२,५३९-- ४९.४१
हडपसर १,५४,७८५-- १,२२,८४८ --१२--२,७७,६४५ --४७.७१
एकूण ७,७३,९६९ --६,०१,५९१ --३३-- १३,७५,५९३-- ५४.१६