पूर्वीच्या भांडणावरून २ मोटारी जाळल्या

पुणे : पूर्वी झालेल्या भांडणाच्या रागातून २ चारचाकी गाड्या जाळण्याचा प्रकार धानोरीमध्ये मंगळवारी पहाटे घडला. विश्रांतवाडी पोलिसांनी जाळपोळ करणाऱ्यास अटक केली आहे.

अशोक महादेव कांबळे (वय ५२, रा. भैरवनगर, धानोरी) असे अटक केलेल्याचे नाव आहे. याप्रकरणी रामचंद्र प्रभाकर चौरे (वय ४१, रा. धानोरी) यांनी फिर्याद दिली आहे. चौरे व कांबळे यांच्यात काही दिवसांपूर्वी भांडणे झाली होती. या रागातून कांबळे यांनी गोकुळनगरकडे जाणाऱ्या रस्त्यावर चौरे यांनी लावलेल्या मोटारीवर ज्वलनशील पदार्थ टाकून जाळली. त्यांच्या शेजारी पार्क केलेली सोहेल पठाण यांची मोटार देखील या प्रकारात जळून गेली. पोलिसांनी केलेल्या चौकशीत हा सर्व प्रकार कांबळे याने केल्याचे निष्पन्न झाले. पोलिसांनी कांबळे याला अटक केली. पूर्वीच्या भांडणातून हा प्रकार केल्याचे त्याने सांगितले.