ट्रक पलटी, १ ठार

भोसे (ता. खेड) येथील चाकण-शिक्रापूर रस्त्यावरील प्राथमिक शाळेजवळ, वेगाने जाणारा ट्रक पलटी होऊन झालेल्या अपघातात साहेबराव भागुजी ओव्हाळ (वय-७५ वर्षे) यांचा मृत्यू झाला.

काळूस : भोसे (ता. खेड) येथील चाकण-शिक्रापूर रस्त्यावरील प्राथमिक शाळेजवळ, वेगाने जाणारा ट्रक पलटी होऊन झालेल्या अपघातात साहेबराव भागुजी ओव्हाळ (वय-७५ वर्षे) यांचा मृत्यू झाला.
भोसे प्राथमिक शाळेजवळील चारीत चाकणवरुन शिक्रापूरकडे जाणारा ट्रक (एमएच-०६ एक्यू-५०७४) सकाळी १०.३० च्या सुमारास पलटी झाला.
या वेळी शाळेच्या भिंतीजवळ बसलेल्या साहेबराव ओव्हाळ यांच्या अंगावर ट्रकमधील अवजड लोखंडी प्लेट पडल्याने या अपघातात त्यांचा मृत्यू झाला. या घटनेची खबर पोलीस पाटील सुनील ओव्हाळ यांनी चाकण पोलिसांना दिली. ओव्हाळ यांना चाकण येथे उपचारासाठी नेले असता दरम्यानच्या काळात त्यांचा मृत्यू झाला.(वार्ताहर)

वारंवार अपघात ....
या ठिकाणी रस्त्याकडेस जिल्हा परिषद शाळेची इमारत असून, शाळेत सुमारे ४०० विद्यार्थी शिक्षण घेतात. शाळा आणि रस्त्याच्या मध्ये चारी असून साईडपट्ट्या नावालाही शिल्लक नाहीत. आतापर्यंत आठ ते दहा ट्रक - ट्रेलर पलटी झाले असून, या ठिकाणी साईडपट्ट्या तातडीने करण्याची मागणी सर्जेराव लोणारी, तानाजी कुटे, पैलवान सुरेश कुटे, मुचकुंद जाधव, बाळासाहेब कुटे यांनी केली आहे.