बीआरटीच्या बसथांब्याला ट्रक धडकला

हडपसर : सोलापूर रस्त्यावर वैदूवाडी चौकातील वाहतूक शाखेसमोर बीआरटीच्या बसथांब्याला ट्रक धडकून अपघात झाला. ही घटना रात्रीच्या वेळी घडली. त्यामुळे मोठा अनर्थ टळला. स्वारगेट-हडपसर दरम्यान बीआरटी मार्गच शिल्लक राहिला नाही, तर बसथांबे अद्याप रस्त्याच्या मधोमध का ठेवले आहेत. सामान्य नागरिकांचे बळी घ्यायचे आहेत का, हडपसरवासीयांना सुरळीत जीवन जगू द्यायचे नाही का, असे एक ना अनेक प्रश्न सामान्य नागरिकांकडून उपस्थित केले जात आहेत.

हडपसर-स्वारगेट दरम्यान बीआरटी मार्ग अवघा अर्धा किमी आणि बसथांबे रस्त्याच्या मध्येच शिल्लक आहेत. त्यामुळे वारंवार अपघात होत आहेत. याबाबत वरिष्ठ अधिकाऱ्यांकडे वारंवार तक्रारही केल्या आहेत. मात्र प्रशासन त्याकडे गांभीर्याने पाहत नाही. आणखी किती वाहनचालकांचे बळी गेल्यानंतर प्रशासन अडथळा ठरणारे बसथांबे आणि बीआरटी मार्ग काढणार आहे, असा संतप्त सवाल वाहनचालकांनी उपस्थित केला आहे.

मगरपट्टा चौकातून स्वारगेटकडे जातानाच्या बीआरटी दुभाजकावर फक्त बीआरटी बसेससाठी असा फलक लावला आहे. फातिमानगर चौक ते रामटेकडी आणि वैदूवाडी चौक ते मगरपट्टा चौक दरम्य़ानचा बीआरटीचे दुभाजक काढून टाकले. दरम्यानच्या काळात कोरोनाने शिरकाव केल्यामुळे पुढील काही कामे अर्धवट राहिली आहेत. हडपसर-स्वारगेट बीआरटी मार्गावरील अडथळा ठरणारे बीआरटीचे बसथांबे आणि बीआरटी मार्ग काढून वाहतुकीलाठी मार्ग खुला करावा, अशी मागणी नागरिकांकडून केली जात आहे.

बीआरटी मार्ग अन् बसथांबे धोक्याचे

बसथांबे रस्त्यात आहेत. त्यामुळे लहान मुले, महिला, वृद्ध, अपंग नागरिक, ज्येष्ठ नागरिक यांना वाहनाच्या गर्दीमुळे बसथांब्यावर जीव मुठीत धरून ये-जा करावी लागत आहे. याबाबत महापौर, उपमहापौर, स्थायी समिती अध्यक्ष आणि इतरही पदाधिकाऱ्यांशी चर्चा करून बीआरटी मार्ग आणि बसथांबे नागरिकांसाठी धोक्याचे आहेत, हे निदर्शनास आणून दिले आहे. मात्र, अद्याप त्यावर उपाययोजना करण्यासाठी कोणीही का पुढाकार घेत नाही, असा संतप्त सवाल नागरिकांनी उपस्थित केला आहे.

फोटो : सोलापूर रस्त्यावर वैदूवाडी चौकातील वाहतूक शाखेसमोर बीआरटीच्या बसथांब्याला शनिवारी ट्रक धडकून अपघात झाला.