लंघेवाडी-चव्हाणवाडी करवसुलीत पुणे जिल्ह्यात अव्वल

ग्रामपंचायतीला ग्रामस्थांकडून पाणीपट्टी, घरपट्टीच्या रूपाने महसूल जमा होतो. या रकमेवर गावचा खर्च, तसेच विकासकामांना चालना मिळत असते. कर जमा करताना ग्रामपंचायतला विविध उपाययोजना कराव्या लागतात.बऱ्याचदा असे कर भरण्यास नागरिकांमध्ये उदासीनता असते. मात्र, लंघेवाडी -चव्हाणवाडी ( ता. शिरूर ) ही छोटीशी ग्रामपंचायत याला अपवाद ठरत आहे. गेल्या दोन वर्षांपासून १०० % करवसुली करत या ग्रामपंचायतने पुणे जिल्ह्यात अव्वल स्थान पटकाविले आहे. यावर्षी कोरोना सारखे जागतिक महामारीचे संकट आणि लॉकडाऊन असतानाही ग्रामस्थांनी स्वयंस्फूर्तीने तब्बल ३,३९,७५० रुपये एवढी रक्कम भरून १०० % कर जमा केला आहे. या छोट्या ग्रामपंचायतचा आदर्श पॅटर्न संपूर्ण राज्यात दिशादर्शक ठरू शकते. या उपक्रमासाठी गावचे आदर्श संतोषराव लंघे, उपसरपंच स्वातीताई हराळे, ग्रामसेविका एस. व्ही. पोळ, ग्रामपंचायत सदस्य जयश्रीताई लोखंडे, प्रभावती गरुड, शोभाताई मोहिते, वैभव जगदाळे, अक्षय बांदल, महेंद्र जासुद, कर्मचारी कर्मचारी, आजी -माजी पदाधिकारी, महिला बचत गट, युवक, युवती प्रयत्न करत आहेत. या १०० % करवसुलीबाबत शिरूरचे गटविकास अधिकारी नलावडे, विस्तार अधिकारी शिंदे यांनी ग्रामस्थांचे कौतुक केले आहे.

" प्रत्येक ग्रामस्थास ग्रामपंचायत आपली वाटत आहे. गावचा विकास प्रत्येकाच्या सहभागातून शक्य आहे ही भावना सर्वांची आहे. त्यामुळे प्रत्येक जण स्वयंप्रेरणेने विविध कर भरून ग्रामविकासात आपले योगदान देत आहे. हा पॅटर्न संपूर्ण राज्याला दिशादर्शक ठरू शकतो. " -संतोषराव लंघे. सरपंच

सरपंच संतोषराव लंघे यांचा फोटो