धायरी : सिंहगड रस्त्यावरील गोऱ्हे बुद्रुक गावात एका दुकानदाराकडून फुकट सिगारेट घेण्यासाठी काही सराईतांनी तलवार दाखवून दहशत माजविण्याचा प्रयत्न केला. रविवारी सायंकाळी पाचच्या सुमारास ही घटना घडली. यातील काही जण सराईत आरोपी असून हवेली पोलिस शोध घेत आहेत. एका महिलेने गाडी हळू चालवा, असे म्हटले म्हणून सराइतांनी संबंधित महिलेलाही मारहाण केली. लहान मुलाच्या अंगावर दुचाकी घालण्याचा प्रयत्न केला, अशी माहिती स्थानिकांनी दिली.
अधिक माहितीनुसार, गोऱ्हे बुद्रुक येथील माळवाडीत सायंकाळी महिला आपल्या घरासमोर बसली होती. लहान मुले बाहेर खेळत होती. रस्त्यावरून काही तरुण दुचाकीने भरधाव ये-जा करत होते. महिलेने मुले खेळत असल्याने दुचाकीस्वारांना हळू गाडी चालवा, म्हणून सांगितले असता त्याचा राग धरून मारहाण केली. पुन्हा काही वेळाने येत अर्वाच्य भाषेत शिवीगाळ करू लागले. या घटनेचा व्हिडीओ परिसरात व्हायरल झाला असून संबंधित तरुण सराईत गुन्हेगार आहे. गांजाची नशा करून हे सराईत सातत्याने गावात दहशत निर्माण करण्याचा प्रयत्न करत असल्याचीही माहिती समोर येत आहे. आरोपींना पकडण्यासाठी दोन पथके रवाना केली आहेत. त्यांच्यावर कठोर कारवाई करण्यात येईल, असे हवेली ठाण्याचे पोलिस निरीक्षक सदाशिव शेलार यांनी सांगितले.