पुणे : शहरातील तब्बल ६० पुलांचे स्ट्रक्चरल ऑडिटच करण्यात आलेले नसल्याची धक्कादायक माहिती समोर आली आहे. शहरात एकूण ८६ मोठे पूल, तर १७० लहान पूल असून, त्यापैकी अवघ्या ३८ पुलांचे स्ट्रक्चरल ऑडिट करण्यात आलेले आहे. त्यापैकी ११ पुलांच्या दुरुस्तीचे काम सुरू असून २३ पुलांचे तातडीने स्ट्रक्चरल ऑडिट केले जाणार आहे. दरम्यान, मावळ तालुक्यातील कुंडमळा या पर्यटनस्थळी रविवारी इंद्रायणी नदीवरील लोखंडी साकव पूल अचानक कोसळल्याने अनेक पर्यटक नदीत पडले आणि वाहून गेले. चार जणांचे मृतदेह सापडले असून, ३२ जण यामध्ये जखमी झाले होते. या पार्श्वभूमीवर शहरातील धोकादायक पुलांचा प्रश्न ऐरणीवर आला आहे.
शहरातून ४४ किलोमीटर लांब मुळा-मुठा नदी वाहते. या दोन्ही नद्यांमध्ये ब्रिटिशकालीन पूल आहेत. त्यात गेल्या काही वर्षांत नवीन पुलांची भर पडली आहे. शहरातील वाहतूक सुरळीत करण्यासाठी, शहराचे दोन्ही भाग जोडण्यासाठी विकास आराखड्यातही अनेक पूल सुचविलेले आहेत. शहराचा विस्तार आणि वाहतुकीची समस्या गंभीर होत असताना पुलांची संख्या वाढवून पर्यायी मार्ग तयार केले जात आहेत. यासोबतच नवीन व जुन्या पुलांच्या सुरक्षिततेचा प्रश्न उपस्थित होत आहे. विशेषतः पावसाळ्यात नदी, नाल्यांना पूर आल्याने पूल वाहून गेल्यामुळे अपघात घडल्याच्या घटना घडलेल्या आहेत. पुणे महापालिकेने २०१३-१४ मध्ये १८ नद्यांवरील पुलांचे, तर २०१८-१९ मध्ये १२ पूल आणि उड्डाणपुलांचे स्ट्रक्चरल ऑडिट केले. त्यानंतर पुणे शहरातील २० वर्षांपेक्षा जुन्या झालेल्या ३८ पुलांचे पुणे महापालिकेने वर्ष २०२१ मध्ये स्ट्रक्चरल ऑडिट केले. नदीवरील ३२ पूल, २० उड्डाणपूल, ९ रेल्वे उड्डाणपूल या प्रमुख पुलांची संख्या ६१ आहे. त्यापैकी ३८ पुलांचे स्ट्रक्चरल ऑडिट झाले आहे. उर्वरित २३ पुलांचे स्ट्रक्चरल ऑडिट करण्यात आलेले नाही. या पुलांचे स्ट्रक्चरल ऑडिट तातडीने केले जाणार आहे.
शहरातील सर्व पुलांचे स्ट्रक्चरल ऑडिट केेले जाणार आहे. या पुलांचे दरवर्षी स्ट्रक्चरल ऑडिट करणे आवश्यक आहे. - नवल किशाेर राम, आयुक्त, पुणे महापालिका