खोर : खोर (ता.दौंड) येथे झालेल्या सामूहिक बलात्कार प्रकरणातील आरोपींना न्यायालयाने पाच दिवसांची (५ फेब्रुवारी पर्यंत) पोलिस कोठडी सुनावली आहे. हि घटना शनिवार दि.२९ रोजी सायंकाळी साडे आठ ते अकराच्या सुमारास घडली होती.
या बाबत माहिती अशी की, खामगाव (ता. दौंड) येथे राहणाऱ्या एका विवाहितेवर खोर (ता.दौंड) येथील आरोपी अजय बापू चौधरी (वय २२), किरण रोहिदास चौधरी (वय २७), शंकर संपत चौधरी (वय २६), नवनाथ नाना कोकरे (वय ३२) सर्व राहणार खोर येथील असून संतोष भगवान चव्हाण (वय ३२ , रा. गिरीम, ता.दौंड) यांनी खोर परिसरातील इनामाच्या टेकड़ीवर नेऊन या महिलेवर सामूहिक बलात्कार केला होता.
या महिलेने दिलेल्या जबाबावरून या पाच नराधामांच्या विरोधात तक्रार दाखल केल्या. नंतर अवघ्या १२ तासांच्या आत हे आरोपी जेरबंद करण्यात यवत पोलिसांना यश आले. या आरोपींना सोमवार दि.३१ रोजी बारामती जिल्हा सत्र न्यायालया समोर हजर करण्यात आले होते. यावेळी न्यायालयाने या पाच आरोपींना पाच दिवसांची (५ फेब्रुवारी पर्यंत) पोलीस कोठडी सुनावली गेली असल्याची माहिती यवत पोलिसांनी दिली. दरम्यान पीड़ित महिला दलित समाजाची असल्याने इतर गुन्ह्या बरोबर आरोपी विरुद्ध दलित अत्याचार प्रतिबंधक कायद्यानुसार अँट्रॉसिटीचा गुन्हा देखील दाखल करण्यात आला आहे. दौंडचे उपविभागीय पोलिस अधिकारी राहुल धस यांच्या मार्गदर्शनाखाली पुढील तपास सुरु असल्याचे यवत पोलिसांनी सांगितले आहे.