थोपटेवाडीतील आगीत २१ लाखांचे नुकसान

पानशेत रस्त्यावरील थोपटेवाडी येथे रविवारी रात्री घरांना लागलेल्या आगीत तिन्ही घरांचे जवळपास २१ लाख रुपयांचे नुकसान झाल्याचे स्पष्ट झाले

खडकवासला : पानशेत रस्त्यावरील थोपटेवाडी येथे रविवारी रात्री घरांना लागलेल्या आगीत तिन्ही घरांचे जवळपास २१ लाख रुपयांचे नुकसान झाल्याचे स्पष्ट झाले असून, आज मंडल अधिकारी व तलाठी यांनी नुकसानाचे पंचनामे केले. नुकसानग्रस्तांना तातडीची मदत म्हणून स्थानिक कार्यकर्त्यांनी मदतीचा हात दिला. घेरा सिंहगड हद्दितील थोपटेवाडी येथे रविवारी रात्री ही दुर्दैवी घटना घडली होती. आग विझविण्यासाठी ग्रामस्थांनी कसोशीने प्रयत्न केले. मात्र या तीनही घरांचे नुकसान वाचविण्यात अपयश आले. तर घरातील एक युवकही जखमीही झाला होता. खडकवासला मंडल अधिकारी एस. जी. जगताप, तलाठी एम. एस. गोगावले, सुभाष सपकाळ व ओम शिर्के यांनी संबधीत जळीतग्रस्त घरांची पाहणी करुन पंचनामे केले. तीनही घरांचे मिळुन एकवीस लाख रुपयांचे नुकसान झाल्याचे या पंचनाम्यात स्पष्ट झाले. तांदुळ, तयार भात पिक, ज्वारी अशा धान्याबरोबरच, भांडी, फर्निचर, शेतीची औजारे व कपड्यांचा यात समावेश होतो. घरातील सामान हलविताना गणेश दत्तु थोपटे (वय ३५ ) हा भाजल्याने जखमी झाला असून त्याचेवर पुणे येथे उपचार सुरु आहेत. तीनही कुटुंबाना तातडीची मदत म्हणुन जिल्हा परिषद सदस्य नवनाथ पारगे, बाजार समितीचे माजी उपसभापती बाळासाहेब पारगे तर सरपंच गुलाब थोपटे यांनी आर्थिक मदत केली. सकाळी आमदार भिमराव तापकीर यांनी हवेलीचे तहसिलदारांशी संपर्क साधुन या बाबत संबधीतांना योग्य मदतीबाबत महसुल खात्याने आवश्यक मदत करण्याबात सुचना केली. (वार्ताहर)