पुणे : धायरीत राहत्या घरात शिरुन अल्पवयीन मुलीवर अत्याचार करुन तिच्या खून प्रकरणाचा छडा लावण्यात सिंहगड पोलिसांना यश आले आहे. सख्या काकानेच हे कृत्य केल्याचे उघडकीस आले आहे.
नितीन दामोदर असे काकाचे नाव असून तो मुलीच्या मावशीचा पती आहे. नितीन एका दुकानात काम करतो. आई वडिल कामावर गेल्यानंतर एकट्या असणाऱ्या या १७ वर्षाच्या मुलीवर अत्याचार करण्यात आला होता. त्याबाबत कोणतीही माहिती पोलिसांना नव्हती. परिसरात सीसीटीव्ही नसल्याने तसेच या मुलीच्या मोबाईल व अन्य बाबीपासून काहीही पुरावा उपलब्ध झाला नव्हता. सिंहगड पोलिसांना मध्यरात्री काही तांत्रिक माहिती तसेच परिसरात केलेल्या पाहणी व चौकशीतून नितीन दामोदर याच्या बाबत माहिती मिळाली. त्यानुसार त्याला ताब्यात घेण्यात आले. अतिशय गंभीर गुन्ह्याचा तपास 12 तासात लावण्यात सिंहगड पोलिसांना यश मिळाले आहे.
मुलीचे कुटुंबिय सिंहगड भागातील धायरेश्वर वस्ती येथील एका इमारतीत तिसऱ्या मजल्यावर राहते, ही मुलगी परिसरातील एका महाविद्यालयात अकरावीच्या वर्गात शिक्षण घेत होती. तिला एक 13 वर्षांचा भाऊ असून, तो आठवीत शिकतो. तिचे आई-वडिल मोल-मजूरीचे कामे करतात. नेहमीप्रमाणे आई-वडिल गुरुवारी सकाळी कामासाठी घराबाहेर पडले होते. तर भाऊ शाळेत गेला होता. त्यामुळे ही मुलगी घरी एकटीच होती. तिचा भाऊ सायंकाळी साडेपाचच्या सुमारास शाळेतून घरी आल्यानंतर त्याने बहिण बेशुद्ध अवस्थेत बेडवर पडलेली पाहिली. भावाने तिला आवाज देऊन उठविण्याचा प्रयत्न केला. मात्र अनेकदा आवाज देऊनही ती उठत नसल्याने त्याने आई-वडिलांना फोनकरून याबाबत माहिती दिली. मुलाचा फोन आल्यामुळे आई-वडिलांनी तत्काळ घरी धाव घेतली. यानंतर त्यांनी त्वरीत तिला जवळच्या खासगी रुग्णालयात नेले. मात्र डॉक्टरांनी तिला तपासून मृत घोषित केले. दरम्यान, तिचा हात, पाय आणि गळ्यावर जखमा झाल्या आहेत. शवविच्छेदन करण्यात आले असता तिच्यावर बलात्कार झाल्याचे निष्पन्न झाले. शवविच्छेदनात बलात्कार करून तिचा गळा आवळून खून करण्यात आल्याचे उघडकीस आले होते.