पुणे : भाईगिरी करण्यासाठी त्याने बेकायदेशीरपणे गावठी पिस्तुल मिळवले. मित्रावर रुबाब दाखविण्यासाठी त्याला ते दाखविणे, मात्र चांगलेच महागात पडले. मित्र पिस्तुल पहात असताना अचानक चाप ओढला गेल्याने गोळी सुटून ती तरुणाच्या मानेत शिरली. या घटनेत अभय छबन वाईकर (वय २२, रा. सांगरुण, ता. हवेली) हा जखमी झाला असून त्याच्यावर दिनानाथ मंगेशकर हॉस्पिटलमध्ये उपचार करण्यात येत आहे.
याबाबत पोलीस हवालदार आनंद रोहिदास घोलप यांनी उत्तमनगर पोलीस ठाण्यात फिर्याद दिली आहे. त्यानुसार पोलिसांनी जखमी अभय वाईकर व अविष्कार ऊर्फ मोन्या तुकाराम धनवडे (वय १९, रा. सांगरुण, ता. हवेली) यांच्यावर गुन्हा दाखल केला आहे.
याबाबत पोलिसांनी सांगितले की, अभय वाईकर व अविष्कार धनवडे हे दोघेही काही काम धंदा करत नाही. सांगरुण गावातील गणपती मंदिरात बुधवारी रात्री दहा वाजता ते जमले होते. अभय वाईकर याने एक गावठी पिस्तुल मिळविले. ते त्याने अविष्कार याला दाखवत त्यांच्यावर शायनिंग मारण्याचा प्रयत्न केला. अविष्कार याने ते पिस्तुल त्याच्याकडून घेऊन पहात असताना अचानक त्याच्याकडून पिस्तुलाचा चाप ओढला गेला व गोळी सुटून ती अभय याच्या मानेत घुसली. त्याला तातडीने दिनानाथ मंगेशकर हॉस्पिटलमध्ये दाखल केल्याने त्याचा जीव वाचला असून सध्या त्याच्यावर उपचार सुरु आहेत. सहायक पोलीस निरीक्षक पवार तपास करीत आहेत.