नोकरीच्या आमिषाने तिची ९ लाखांची फसवणूक, पोलिसांमुळे ९९ टक्के रक्कम मिळाली परत

पुणे : मुंबई, पुण्यातील मल्ट्री नॅशनल कंपनीमध्ये चांगल्या पगाराची नोकरी लावण्याच्या आमिषाने एका उच्च शिक्षित महिलेची सायबर चोरट्यांनी ९ लाख २५ हजार ३८० रुपयांची फसवणूक केली होती. सायबर पोलिसांनी तातडीने कारवाई करून या गुन्ह्यातील ९९ टक्के रक्कम गोठविली. न्यायालयात पाठपुरावा करून वेळेत रिटर्न ऑफ प्रॉपर्टीचे आदेश घेऊन फिर्यादीची ९ लाख १३ हजार ७०८ रुपये परत मिळवून दिले. सायबर क्राईममधील फसवणुकीतील ९९ टक्के रक्कम परत मिळविण्याचा बहुदा हा पहिलाच प्रकार आहे.

उच्च शिक्षित महिलेने नोकरीसाठी ऑनलाईन जॉब पोर्टलवर बायोडाटा अपलोड केला होता. फेब्रुवारी व मार्च २०२१मध्ये सायबर चोरट्यांनी या महिलेला वेगवेगळ्या मोबाईलवरून व बनावट डोमेन तयार करून बनावट ई-मेलचा वापर करून संपर्क साधला. पुणे, मुंबई येथील मल्टी नॅशनल कंपनीमध्ये चांगल्या पगाराची नोकरी लावण्याचे आमिष दाखविले. त्यांना प्रत्येक वेळी रजिस्ट्रेशन फी, मुलाखतीकरिता फी, वैद्यकीय चाचणी फी, जॉब कन्फरमेशन, सिक्युरिटी आय डी, बाँड कन्फरमेशन, जीएसटी, टिडीएस, रिफंड प्रोसेस, फंड ट्रान्सफर अशी वेगवेगळी कारणे सांगून पेमेंट लिंकद्वारे त्यांना एकूण ९ लाख २५ हजार ३८० रुपये भरायला लावले. आपली फसवणूक झाल्याचे या महिलेच्या लक्षात आल्यावर सायबर पोलिसांनी तातडीने तांत्रिक विश्लेषण करुन या गुन्ह्यातील आरोपी निष्पन्न केले. आरोपींच्या बँकांची माहिती प्राप्त करुन, ती बँक खाती गोठवली. त्यानंतर तातडीने न्यायालयात पाठपुरावा करून फसवणूक झालेल्या रकमेपैकी ९९ टक्के रक्कम फिर्यादीला परत मिळवून दिली.

अनेकदा सायबर चोरटे हे एखाद्याने त्यांनी सांगितलेल्या त्यांच्या बँक खात्यात पैसे भरले की ते तातडीने दुसऱ्या, तिसऱ्या बँक खात्यात ट्रान्सफर करून नंतर काढून घेतात. त्यामुळे अनेक प्रकरणात फिर्यादी पोलिसांपर्यंत पोहोचणे व त्यांच्या रकमेचा माग काढेपर्यंत सायबर चोरट्यांनी बहुतांश रक्कम काढून घेतलेली असते. या प्रकरणात मात्र पोलिसांना यश आले आहे.

पोलीस उपायुक्त भाग्यश्री नवटके, सहायक पोलीस आयुक्त मिलिंद पाटील, पोलीस निरीक्षक मच्छिंद्र पंडित, पोलीस निरीक्षक अंकुश चिंतामण, सहायक निरीक्षक गणेश पवार, हवालदार अस्लम आत्तार, पोलीस अंमलदार मंगेश नेवसे, सोमनाथ भोरडे, योगेश वाव्हळ, प्रवीणसिंग राजपूत, शिरीष गावडे, अमोल कदम, उमा पालवे, पूजा मांदळे यांनी ही कामगिरी केली़

.....

नागरिकांनी सावध राहावे

ऑनलाईन पद्धतीने नोकरीचे, लॉटरीचे, बक्षिसाचे, कर्ज मंजूर करण्याचे आमिष दाखवून पैसे भरावयास लावणाऱ्या गुन्हेगारी टोळ्यांपासून नागरिकांनी सावध राहावे. अशा आमिषांना बळी पडू नये, अशा घटनांबाबत तत्काळ सायबर पोलीस ठाण्यात संपर्क साधावा, असे आवाहन करण्यात आले आहे.