- विशाल विकारी
लोणावळा (पुणे) : कार्ला गावातील वॅक्स म्युझियममध्ये मराठा तरुणाने मनोज जरांगे-पाटील यांचा मेणाचा पुतळा साकारला आहे. हुबेहूब प्रतिकृती बनवण्यात आली आहे. अशोक म्हाळसकर यांनी अवघ्या तीन महिन्यांमध्ये जरांगे-पाटील यांच्या शरीरयष्टीचे मोजमाप घेऊन पाच फूट सात इंच उंचीची प्रतिकृती तयार केली आहे.
मराठा आरक्षणाच्या मागणीसाठी मुंबईच्या दिशेने पायी निघालेले मनोज जरांगे-पाटील बुधवारी (दि. २४) कार्ला फाटा येथून पुढे जाणार आहेत. त्यांच्या आगमनापूर्वी येथील वॅक्स म्युझियममध्ये त्यांचा मेणाचा पुतळा तयार झाला आहे. जरांगे-पाटील तेथे भेट देऊन स्वत:चा मेणाचा पुतळा पाहणार का, याबाबत सध्यातरी काही स्पष्टता नसली तरी उत्कंठा निर्माण झाली आहे.
याविषयी अशोक म्हाळसकर व त्यांचा मुलगा ऋषी म्हाळसकर म्हणाले की, मनोज जरांगे-पाटील हे मराठा समाजाला आरक्षण मिळावे, याकरिता मोठी लढाई लढत आहेत. अशा संघर्ष योद्ध्याचे स्मरण कायम रहावे, याकरिता हा मेणाचा पुतळा तयार करण्यात आला आहे. ही सकल मराठा समाजासाठी अभिमानाची व गौरवाची बाब आहे. हा पुतळा साकारण्याचे भाग्य आम्हाला मिळाले. तीन महिन्यांमध्ये जरांगे-पाटील यांच्या शरीरयष्टीचे मोजमाप घेऊन पाच फूट सात इंच उंचीची प्रतिकृती तयार केली आहे.