शिक्रापूर (पुणे) : तळेगाव ढमढेरे येथील मुख्य बाजारपेठेतील एका सोनाराच्या दुकानात दाम्पत्य दुकान बंद करत असताना रात्री ८ वाजेच्या सुमारास अचानक एका युवकाने दुकानात घुसून दाम्पत्याला हत्यारासारख्या वस्तूने मारहाण केल्याने खळबळ उडाली असून, दरोडासदृश घटनेने परिसरात भीतीचे वातावरण निर्माण झाले आहे.
तळेगाव ढमढेरे येथील महेंद्र शहा यांच्या सोन्या-चांदीच्या दुकानामध्ये सायंकाळी ८ वाजण्याच्या सुमारास महेंद्र जयंतीलाल शहा व सरिताबेन महेंद्र शहा हे दोघेजण दुकान बंद करत असताना अचानक एक युवक दुकानामध्ये आला व त्याने शहा दाम्पत्याला कोणत्यातरी हत्यारसदृश वस्तूने मारहाण करण्यास सुरुवात केली. दोघांनी आरडाओरडा केला, याचवेळी शेजारी नागरिकांनीही आरडाओरडा सुरू केल्याने युवक दुकानातील मागील दरवाज्याने पळून गेला. या घटनेत सरिताबेन शहा या किरकोळ जखमी झाल्या.
घटनेची माहिती मिळताच शिक्रापूर पोलिस स्टेशनचे पोलिस निरीक्षक प्रमोद शिरसागर, सहायक पोलिस निरीक्षक नितीन आतकर, पोलिस हवलदार किशोर तेलंग, संदीप कारंडे, आत्माराम तळोले, भरत कोळी, पोलिस नाईक जयदीप देवकर, संतोष शिंदे, विकास पाटील, अंबादास थोरे, रोहिदास पारखे यांसह आदींनी तातडीने घटनास्थळी धाव घेतली. यावेळी अचानक घडलेल्या प्रकाराने आणि पोलिसांचा ताफा बाजारपेठेत हजर झाल्याने एकच खळबळ उडाली. दरम्यान, पोलिसांनी दुकानातील सीसीटीव्हीची पाहणी केली असता घडलेला सर्व प्रकार सीसीटीव्हीमध्ये कैद झाला आहे. याबाबत रात्री उशिरापर्यंत गुन्हा दाखल करण्याचे काम सुरू होते. मात्र सर्व तपासानंतर याबाबतचा प्रकार समोर येईल, असे शिक्रापूर पोलिसांनी सांगितले.
बाजाराच्या दिवशी घडलेल्या घटनेने खळबळ
तळेगाव ढमढेरे येथे सोमवारी आठवडे बाजार असतो आणि ऐन बाजाराच्या दिवशीच बाजारपेठेमध्ये घडलेल्या या घटनेमुळे मोठी खळबळ उडाली असून, नागरिकांमध्ये दहशतीचे वातावरण निर्माण झाले आहे. घडलेल्या प्रकारामुळे पोलिसांच्या तपासाकडे नागरिकांचे लक्ष लागले आहे.