पुणे : ‘आय लव्ह यू , मला तू खूप आवडतेस,’ असे बोलून प्रेमाच्या जाळ्यात ओढून लग्नाचे आमिष दाखवत शारीरिक संबंध प्रस्तापित केले व लग्नास नकार देऊन तरुणीला आत्महत्येस प्रवृत्त केल्याप्रकरणी एका २५ वर्षीय तरुणावर हडपसरपोलिस स्टेशनमध्ये गुन्हा दाखल करण्यात आला आहे.
दत्तात्रय कैलास कदम (रा. शिवतेजनगर, काळेपडळ, हडपसर) असे गुन्हा दाखल झालेल्या तरुणाचे नाव आहे. याप्रकरणी २३ वर्षीय तरुणीने फिर्याद दिली आहे. ऑक्टोबर २०२३ ते अद्यापर्यंत हा प्रकार सुरू होता. आरोपी तरुणाने तरुणीस आय लव्ह यू , मला तू खूप आवडतेस, असे बोलून फिर्यादी तरुणीशी लग्न करणार असल्याचे खोटे आमिष दाखविले आणि वेळोवेळी फिर्यादी हिच्याशी शारीरिक संबंध निर्माण केले.
फिर्यादी यांनी वारंवार आरोपीला लग्नाबाबत विचारले असात, मी तुझ्यासोबत लग्न करू शकत नाही, असे आरोपीने म्हटल्याने मानसिक त्रासातून तरुणीने डाव्या हाताची नस कापून आत्महत्या करण्याचा प्रयत्न केला. तरुणीला आत्महत्येस प्रवृत्त केल्याप्रकरणी तरुणावर गुन्हा दाखल करण्यात आला आहे. या प्रकरणाचा पुढील तपास पोलिस निरीक्षक रोकडे करीत आहेत.