पुणे : लग्नाचे आमिष दाखवून तरुणीसोबत सात ते आठ वेळा जबरदस्तीने शारीरिक संबंध ठेवले. यानंतर याबाबत घरच्यांना सांगण्याची धमकी देऊन पैशांची मागणी केली. मात्र, तरुणीने पैसे देण्यास नकार दिल्याने आरोपी तरुणाने तिच्यासोबत लग्न करण्यास नकार दिला. याप्रकरणी अहमदनगर येथील तरुणावर सिंहगड रोड पोलिस ठाण्यात गुन्हा दाखल करण्यात आला आहे.
याबाबत सातारा जिल्ह्यातील बावडा येथील २४ वर्षीय तरुणीने शुक्रवारी (दि. १९) सिंहगड रोड पोलिस ठाण्यात फिर्याद दिली आहे. यावरून प्रज्वल नितीन सिदनकर (२४, मुळ रा. श्रीगोंदा, जि. अहमदनगर) याच्यावर गुन्हा दाखल करण्यात आला आहे. हा प्रकार २१ जून २०२३ रोजी सायंकाळी पाचच्या सुमारास सिंहगड रोड येथील एका लॉजमध्ये घडला आहे.
पोलिसांनी दिलेल्या माहितीनुसार, आरोपी प्रज्वल याने फिर्यादी मुलीला प्रेमाच्या जाळ्यात ओढले. आपण लग्न करु असे आमिष तरुणीला दाखवले. त्यानंतर २१ जून रोजी आरोपी त्याच्या दुचाकीवरून सिंहगड रोड परिसरातील एका लॉजमध्ये तीला घेऊन गेला. त्याठिकाणी तिच्यासोबत जबरदस्तीने शारीरिक संबंध ठेवले. यानंतर वारंवार सात ते आठ वेळा तिच्यासोबत शारीरिक संबंध ठेवले. यानंतर आरोपीने तरुणीला लग्न करण्यास नकार दिला.
तसेच घडलेला प्रकार तिच्या घरच्यांना सांगण्याची धमकी देऊन पैशांची मागणी केली. घाबरलेल्या तरुणीने त्याला पैसे दिले. मात्र, आरोपीकडून सतत पैशांची मागणी होत असल्याने तिने आरोपीला पैसे देण्यास नकार दिला. यानंतर आरोपीने आपल्या संबंधाची माहिती तुझ्या घरच्यांना सांगतो. तुझ्याशी लग्न देखील करणार नाही असे म्हणत शिवीगाळ करुन दमदाटी केल्याचे फिर्यादीत म्हटले आहे. याप्रकरणाचा पुढील तपास सहायक पोलिस निरीक्षक कादबाने करत आहेत.