पुणे : कोरोनाकाळात त्या बाणेरमधील त्यांच्या घरातून ससूनमध्ये दररोज खिचडीचे ५०० पेक्षा जास्त डबे पोहोचवित होत्या. त्याआधी त्यांनी केनिया या देशात ‘सोशल बिझनेस’ ही कल्पना राबवून अनेक गरीब कुटुंबे व महिलांना रोजगार मिळवून दिला. त्यांच्या याच कामाची दखल दक्षिण आफ्रिका सरकारने घेतली व त्यांना नोव्हेंबर २०२५ मध्ये तिथे होणाऱ्या जी-२० या जगातील १९ देश व युरोपियन युनियन यांच्या परिषदेच्या युवा विभागाचे अध्यक्षपद दिले आहे.
त्यांचे नाव आहे रोनिता रॉय-घोष. दक्षिण आफ्रिका सरकारचा तुमची जी-२० ती युवा २० परिषदेच्या अध्यक्षपदासाठी संमती मागणारा मेल येताच, त्या भारावून गेल्या. तिथे केलेल्या कामाची अशी दखल घेतली जाईल याची कल्पनाही त्यांना नव्हती. पुण्यात राहणाऱ्या रोनिता आता जगातील अनेक देशांचा समावेश असलेल्या या जागतिक परिषदेत दक्षिण आफ्रिका सरकारचे प्रतिनिधित्व करणार आहेत. त्यासाठीचे त्यांचे काम आतापासून सुरूही झाले आहे.
प्रयागराज (अलाहाबाद) मधील घोष कुटुंबात जन्म झालेल्या रोनिता खऱ्या अर्थाने विश्वकन्या आहेत. अलाबाहाद, दिल्ली, केनिया, तिथून महाराष्ट्र व महाराष्ट्रातून मग पुण्यात असा त्यांचा प्रवास आहे. याशिवाय कामानिमित्ताने त्यांनी जगातील अनेक देशांचा प्रवास केला आहे तो वेगळाच. सध्या त्या वर्ल्ड चेंबर फॉर सोशल बिझनेस या जागतिक स्तरावरील संस्थेच्या अध्यक्ष आहेत. हे काम करतानाच त्या ‘एकत्र’ या संस्थेच्या माध्यमातून महाराष्ट्रातील शेतकऱ्यांसाठीही वेगवेगळ्या स्तरावर काम करत आहेत.
केनियामध्ये त्यांचे प्रदीर्घ काळ वास्तव्य होते. तिथे त्यांनी ‘सोशल बिझनेस’ नावाची एक संकल्पना गरीब कुटुंबासाठी राबवली व त्यांना आर्थिकदृष्ट्या उन्नत केले. दक्षिण आफ्रिका सरकार त्यांच्या या कामाने प्रभावित झाले. तिथे नोव्हेंबरमध्ये जी-२० परिषद होत आहे. या परिषदेचा युवा विभाग असतो. या विभागाचे अध्यक्षपद यजमान देशाकडे असते. दक्षिण आफ्रिका सरकारने यासाठी रोनिता यांची निवड केली. आंतरराष्ट्रीय स्तरावरील अनेकविध सामाजिक विषयांमध्ये रोनिता यांचे योगदान आहे. त्यासंबंधीच्या संस्थांवर त्या सक्रिय असतात. उपाय सुचविण्याबरोबरच ते राबविण्यातही त्यांचा सक्रिय सहभाग असतो.
कोरोनाच्या आधी रोनिता काही कारणाने पुण्यात आल्या होत्या. कोरोना सुरू झाला व त्या इथेच अडकून पडल्या.शांत न राहता त्याकाळात त्या ससूनमधील वैद्यकीय कर्मचारी तसेच कोरोना रुग्ण यांना खिचडीचे डबे पोहचवू लागल्या. त्यावरूनच त्यांना ‘डब्बा दीदी‘ हे नाव पडले. या कामासाठी त्यांनी जिकोनी फौंडेशनची स्थापना केली. ११ लाखांहून अधिक गरजूंना त्यांनी या काळात जेवण दिले. आता त्या पक्क्या पुणेकर झाल्या आहेत. इथून आता कुठेच जाणार नाही, असे त्या म्हणाल्या.