Video : कुस्तीला गालबोट ..! ११ लाखांच्या कुस्तीत थेट पैलवानावर हल्ला? मुळशीत नेमकं काय घडलं?

पौड गावात आयोजित स्पर्धेत तब्बल ११ लाखांची इनामी कुस्ती सुरू होती. दोन्ही पैलवान जवळपास तासभर झुंज देत होते.

पुणे - पुणे जिल्ह्यातील मुळशी तालुक्यात पौड येथे झालेल्या मल्लिकार्जुन कुस्ती किताब स्पर्धेत ११ लाख रुपयांच्या इनामी कुस्ती दरम्यान घडलेल्या गोंधळाने कुस्तीप्रेमींमध्ये संताप व्यक्त केला जात आहे. महाराष्ट्र केसरी सिकंदर शेख आणि पैलवान माऊली कोकाटे यांच्यात रंगलेल्या हाय-व्होल्टेज सामन्यात समर्थकाने आखाड्यात घुसून थेट सिकंदर शेख यांच्यावर हात उगारल्याचा प्रकार घडला.काय घडलं नेमकं?पौड गावात आयोजित स्पर्धेत तब्बल ११ लाखांची इनामी कुस्ती सुरू होती. दोन्ही पैलवान जवळपास तासभर झुंज देत होते. निर्णायक क्षणी कुस्ती आक्रमक होताच दोन्ही बाजूंच्या समर्थकांमध्ये तणाव वाढला. याच वेळी माऊली कोकाटे यांचा एक समर्थक अचानक आखाड्यात घुसला आणि सिकंदर शेख यांच्यावर हात उगारल्याने मैदानात खळबळ उडाली. पुढील काही क्षणांत दोन्ही बाजूंचे समर्थक मैदानात उतरले आणि गोंधळ उडाला. पंच आणि आयोजकांनी हस्तक्षेप करून समर्थकांना बाहेर काढले व सामना पुन्हा सुरू करण्यात आला. दरम्यान  मैदानातील गोंधळाचा व्हिडिओ सोशल मीडियावर व्हायरल झाल्यानंतर कुस्तीप्रेमींनी आयोजकांवर सुरक्षा व्यवस्थेबाबत प्रश्न उपस्थित केले.  कुस्ती सुरू असताना समर्थक आखाड्यात घुसला कसा? सुरक्षा व्यवस्थेत त्रुटी होत्या का? संबंधित व्यक्तीवर कारवाई झाली का? या प्रश्नांची उत्तरे आयोजकांनी द्यावीत, अशी मागणी होत आहे.  

 दीड तास झुंज, निकाल अनिर्णितगोंधळानंतरही दोन्ही पैलवानांनी १५-२० मिनिटे झुंज दिली. दीड तास चाललेल्या लढतीत कोणताही स्पष्ट निकाल लागला नाही. अखेरीस आयोजकांनी दोन्ही पैलवानांना संयुक्त विजेता घोषित केले. कुस्तीच्या परंपरेला धक्का?कुस्ती म्हणजे शौर्य, परंपरा आणि खिलाडूवृत्ती यांचं प्रतीक मानलं जातं. मात्र मुळशीतील घटनेमुळे खेळाच्या शिस्तीवर प्रश्न उपस्थित झाले आहेत. भविष्यात अशा घटना टाळण्यासाठी कडक सुरक्षा आणि नियमांची अंमलबजावणी गरजेची असल्याचं मत व्यक्त होत आहे.