पुणे :पुणे महापालिकेने मिळकत कर थकबाकीदारांसाठी १५ नोव्हेंबरपासून अभय योजना सुरू केली आहे. गेल्या १५ दिवसांत ११ हजार १९१ मिळकतधारकांनी ६५ कोटी ४१ लाख ९५ हजारांचा मिळकत कर भरला आहे. पालिकेच्या अपेक्षेनुसार हे उत्पन्न नसले, तरी नोव्हेंबरमधील अभय योजनेमुळे आतापर्यंत एकूण ७२ कोटी ८२ लाख ५५ हजारांचे उत्पन्न मिळाले आहे. मिळकत कर विभागास २०२५-२६ या आर्थिक वर्षात ३ हजार कोटींचे उद्दिष्ट दिले असून आतापर्यंत १ हजार ८०० कोटींचा महसूल पालिकेच्या तिजोरीत जमा झाला आहे.
शहरात सुमारे साडेसहा लाख मिळकत कर थकबाकीदार असून, त्यांची थकबाकी आणि त्यावरील दंडाची रक्कम मिळून थकबाकी १३ हजार कोटी रुपयांवर पोहोचली आहे. दंडाच्या वाढत्या रकमेमुळे दर चार वर्षांनी ही थकबाकी दुपटीने वाढत आहे. त्यामुळे अभय योजना राबविली आहे. यापूर्वी महापालिकेने २०१६ नंतर चार वेळा अभय योजना राबविली होती. त्या योजनेतील लाभार्थींना यावेळी वगळण्यात आले आहे. त्यामुळे साडेचार लाख मिळकतधारकांना या योजनेचा फायदा होऊ शकतो. या योजनेत थकबाकीवरील दंडाच्या रकमेत ७५ टक्के सवलत देण्यात आली आहे. ही योजना १५ जानेवारीपर्यंत लागू राहणार आहे. या माध्यमातून पालिकेस साडेचारशे कोटींची उत्पन्न अपेक्षित आहे. त्या तुलनेत पालिकेला प्रतिसाद कमी मिळाल्याचे दिसते.
१ लाख ४० हजार मिळकतधारकांना पुन्हा मिळणार लाभ
अभय योजनेत यापूर्वी (वर्ष २०१५-१६, २०१६-१७, २०२०-२१ व २०२१-२२) ज्या मिळकतधारकांनी लाभ घेतला आहे, त्या मिळकतधारकांना या लाभ दिला जाणार नाही, असे महापालिका आयुक्त नवल किशोर राम यांनी स्पष्ट केले होते. मात्र आता यापूर्वी योजनेत लाभ घेतलेल्या मिळकतधारकांना देखील या योजनेचा लाभ देण्यात येणार आहे. या बाबतच्या प्रस्तावाला स्थायी समितीच्या बैठकीत मान्यता देण्यात आली आहे. यापूर्वी योजनांचा लाभ घेतलेले १ लाख ४० हजार ४३७ मिळकतधारक आहेत. त्यांना १ डिसेंबरपासून लाभ देणे सुरु केले जाणार आहे.