- राजू इनामदार
पुणे : लांबणीवर पडणार अशी खात्री वाटत असलेली महापालिका निवडणूक सर्वोच्च न्यायालयामुळे तोंडावर आली. त्यामुळे सगळेच राजकीय पक्ष महापालिकेत सत्ता कशी मिळेल याच्या तयारीला लागले आहेत. बैठका, मेळावे, चर्चा, मतदारसंपर्क अभियान असे पक्षांचे तर प्रभाग निश्चिती, तिथे वेगवेगळे लोकोपयोगी पण स्वत:ला उपयोगी पडतील असे उपक्रम राबविण्यात संभाव्य उमेदवार दंग आहेत.
भारतीय जनता पक्षाला कधी नव्हे ती सलग ५ वर्षे मिळालेली एकहाती सत्ता कशी घालवता येईल याचा राष्ट्रवादी काँग्रेस, काँग्रेस व शिवसेना विचार करते आहे, तर या सर्व प्रस्थापितांना बाजूला सारून आपले स्वतंत्र असे काही करता यावे म्हणून दिल्लीनंतर पंजाबमध्ये झेंडा रोवलेली आम आदमी पार्टी व २९ नगरसेवकांवरून एकदम २ वर आलेली महाराष्ट्र नवनिर्माण सेनाही प्रयत्न करीत आहे.
महाविकास आघाडीचा निर्णय होईल तेव्हा होईल, आपण तयारीला तर लागू, असा विचार करून राज्यातील सत्तेत सहभागी असलेले शिवसेना, राष्ट्रवादी काँग्रेस व काँग्रेस स्वतंत्रपणे मोर्चेबांधणी करीत आहेत. तर भाजपला रिपब्लिकन पार्टी ऑफ इंडिया (आठवले गट) बरोबर असल्याने व हिंदुत्वाचा मुद्दा जोर धरत असल्याने त्यात विरोधकांनी केलेले सर्व आरोप विरघळून जातील याची खात्री वाटत आहे.
अशी आहे राजकीय पक्षांची सद्यस्थिती
भारतीय जनता पार्टी
जमेची बाजू
महापालिकेची मागील ५ वर्षांची सत्ता. ९८ नगरसेवक निवडून आलेले. आरपीआय बरोबर. शहरातील ८ विधानसभा मतदार संघात आमदार. खासदारकीचा महापालिकेत येत असलेला पुणे शहर लोकसभा मतदारसंघ ताब्यात, कार्यकर्त्यांचा मोठा संच, राष्ट्रीय स्वयंसेवक संघाची ताकद. केंद्रात असलेली सत्ता. हिंदुत्त्वाचा गजर.
उणे बाजू
नेत्यांमध्ये मोठी गटबाजी, सत्तेच्या ५ वर्षात पुरे करता न आलेले मोठे प्रकल्प, निविदांच्या स्तरावर झालेला भ्रष्टाचार, त्यावर विरोधकांकडून सातत्याने उडवला जाणारा धुरळा, वाढत असलेले संशयाचे जाळे. पदाधिकारी, कार्यकर्ते यांचा अवाजवी आत्मविश्वास. नगरसेवकांचे बदलले राहणीमान, त्यांच्यावर होत असलेले भ्रष्टाचाराचे आरोप.
राष्ट्रवादी काँग्रेस
जमेची बाजू
सलग दोन वेळच्या महापालिकेतील सत्तेला मागील पंचवार्षिकमध्ये भाजपाने खो दिल्याचा राग. भाजपाच्या वावटळीतसुद्धा मागील वेळी निवडून आलेले ३९ नगरसेवक. पोटनिवडणुकीतही एक मिळालेला विजय, अनुभवी नगरसेवकांची संख्या, उपमुख्यमंत्री अजित पवार देत असलेली ताकद, उपनगरांमधील वर्चस्व.
उणे बाजू
शहराच्या मध्य भागात ताकदीचा अभाव, पक्षावर उमटलेला विशिष्ट वर्गाचा ठसा, दिग्गज नगरसेवकांचे प्रभागापुरते पाहण्याचे धोरण, संघटनेला शक्ती देण्याकडे नेत्यांचे दुर्लक्ष, महापालिका सभागृहातील सत्ताधाऱ्यांबरोबर केलेल्या तडजोडींवर पडलेला प्रकाश, संशयाने पाहणारे मित्र पक्ष.
शिवसेना
जमेची बाजू
विसर्जित सभागृहात १० नगरसेवक, राज्यातील सत्ता, ठाकरे परिवाराची क्रेझ, युवकांचा पक्षाकडे असलेला ओढा, पक्षाच्या प्रतिमेशी एकरूप झालेले कार्यकर्ते.
उणे बाजू
संघटना बांधणीकडे दुर्लक्ष, नगरसेवकांना रचनात्मक काम करण्यात आलेले अपयश, लोकोपयोगी उपक्रम या पक्षाच्या वैशिष्ट्यांचे विस्मरण. मित्र पक्षांची कमतरता, महाविकास आघाडीतील अन्य दोन पक्षांबरोबर राजकीय फरफट.
मनसे
जमेची बाजू
पक्षाध्यक्ष राज ठाकरे यांचा करिष्मा, हिंदुत्त्वाची नवी भूमिका, ठाकरे यांनी पुणे शहराला दिलेले महत्व, तरूणांचा पक्षाकडे असलेला कल, सातत्याने आंदोलने, स्थानिक प्रश्नांवर कायम आक्रमक.
उणे बाजू
प्रभावी नेत्यांचा अभाव, एकखांबी तंबू, २९ नगरसेवकांवरून फक्त २ नगरसेवक, कुठेही सत्ता नाही. संपूर्ण शहरव्यापी संघटन नाही.
काँग्रेस
जमेची बाजू
राष्ट्रीय पक्ष, अनेक वर्षांची सत्ताधारी. तळापर्यंतचा मतदार. सध्या ११ नगरसेवक. पक्षाच्या इतिहासातील कामगिरीमूळे मतदारांमध्ये सहानुभूती. चिन्ह सर्वांपर्यंत पोचलेले.
ऊणे बाजू
संघटना क्षीण. सगळे नेते आणि पदाधिकारीच. कार्यकर्त्यांची संख्या घटलेली. सर्व आघाड्या अकार्यक्षम. तेचतेच चेहरे. नव्यांना संधी नाही.