जैन श्वेतांबर मंदिरात पुजाऱ्याकडून

बारामती: येथील जैन श्वेतांबर मूर्तीपूजक संघाच्या जैन मंदिरात पुजारी (पंडित) म्हणून काम करणाऱ्या रणजितसिंह वदेसिंगभाई बारिया (रा. खरेटी. पो. पारखंडा, ता. हालोल, जि. पंचमहाल, गुजरात) यांनी २ लाख १० हजार रुपयांचा अपहार करत फसवणूक केल्याची घटना घडली.

याप्रकरणी संघाचे सचिव दिलीप जयंतीलाल दोशी यांनी फिर्याद दिली. फेब्रुवारी महिन्यात ही घटना घडली. परंतु संघाच्या काही पदाधिकाऱ्यांना दरम्यानच्या काळात कोरोनाची लागण झाल्याने याबाबत १ एप्रिल रोजी फिर्याद दाखल करण्यात आली.येथील मंदिररात गेल्या सहा-सात वर्षांपासून बारिया हे पंडित म्हणून काम करतात. भाविकांनी दिलेल्या दानाचा हिशोब ठेवणे, रोजचे धार्मिक पूजापाठाचे काम करणे अशी कामे ते करत होते. संघातील पदाधिकारी, सदस्यांचा त्यांनी विश्वास संपादन केला होता. त्यामुळे मंदिराच्या चाव्यादेखील त्यांच्याकडे सोपवल्या होत्या.१५ फेब्रुवारी रोजी तो जैन श्वेतांबर मंदिराच्या व दान पेटीच्या चाव्या अंहिसा भवन येथील खोतील ठेवून निघून गेला. पदाधिकाऱ्यांना मंदिर बंद दिसल्याने बारिया राहत असलेल्या खोलीत ते गेले असता तेथे चाव्या दिसल्या. फिर्यादीने ही बाब संघाच्या पदाधिकाऱ्यांना कळविली. त्यानंतर हिशोबाच्या वह्या व अन्य बाबी तपासण्यात आल्या असता २ लाख १० हजार रुपयांचा अपहार करत फसवणूक केल्याचे लक्षात आले. त्यानुसार फिर्याद दाखल करण्यात आली.