भुरट्या चोरांसाठी पालिकेच्या ‘पायघड्या’

डे्रनेजची झाकणे, पुतळ्यांचा परिसर, रस्ते तसेच पुलांवर लावण्यात आलेले रेलिंग, पीएमपी बसथांब्यांवरील अ‍ॅल्युमिनियम शीट, एवढेच काय, तर महापालिकेच्या

सुनील राऊत, पुणे
डे्रनेजची झाकणे, पुतळ्यांचा परिसर, रस्ते तसेच पुलांवर लावण्यात आलेले रेलिंग, पीएमपी बसथांब्यांवरील अ‍ॅल्युमिनियम शीट, एवढेच काय, तर महापालिकेच्या पथदिव्यांना लावलेल्या फ्यूजवर भुरट्या चोरांकडून हात साफ केले जात असतानाच या चोरांसाठी पर्वणी म्हणून की काय, महापालिकेने नागरिकांना बसण्यासाठी स्टेनलेस स्टीलची महागडी बाकडे रस्त्यावर बसविण्याÞचा घाट घातला आहे. त्यासाठी प्रतिबाक ९ ते १0 हजार रुपये खर्च होणार असून, शहरातील ५0 टक्क्यांहून अधिक प्रभागांमध्ये हे बाक बसविण्याचे काम सुरू करण्यात आले आहे.

एकीकडे महापालिकेने लावलेली लोखंडी बाकडे बसविण्यात आल्यानंतर अवघ्या काही दिवसांतच लंपास होत असताना; ही स्टीलची बाकडे चोरांपासून सुरक्षित राहणार का, असा सवाल उपस्थित केला जात आहे. विशेष म्हणजे नगरसेवकांना प्रभागात तत्काळ काही महत्त्वाची कामे निघाल्यास अथवा काही आवश्यक सोयीसुविधा नागरिकांना पुरवायच्या असल्यास त्यासाठी दिल्या जाणाऱ्या वॉर्डस्तरीय निधीतून ही स्टीलची बाकडे खरेदी केली जात आहेत. त्यामुळे एकीकडे चोरांसाठी पायघड्या घालून दुसरीकडे ही महागडी बाके खरेदी करून नागरिकांनी शहराच्या विकासासाठी जमा केलेल्या कराच्या रकमेची उधळपट्टी करण्याचा नवा फंडा सुरू झाला आहे.
स्टीलची बाकडे दुपटीने महाग
नगरसेवकांच्या आग्रहाखातर महापालिकेकडून खरेदी केली जाणारी ही स्टीलची बाकडे लोखंडी बाकडांपेक्षा महाग आहेत. मागील वर्षापर्यंत खरेदी करण्यात येणाऱ्या बाकडांच्या किमती सुमारे ३ ते ४ हजार रुपयांपर्यंत आहे. तर या स्टीलच्या बाकडांच्या किमती ८ ते ९ हजार रुपयांच्या घरात आहेत. त्यामुळे ही बाकडे जवळपास दुपटीने महाग आहेत. त्यामुळे एका स्टीलच्या बाकडाच्या खरेदीत दोन लोखंडी बाकडे येतात. पण याकडे सोयीस्करपणे दुर्लक्ष केले जात आहे. यापेक्षाही विशेष बाब म्हणजे, ही बाकडे अनेक ठिकाणी नुसती ठेवण्यात आली असून, ती कोणासही उचलून नेणे सहज शक्य आहे.
गेल्या वर्षभरात शहरात पीएमपीने अशाच प्रकारे स्टीलचे बसथांबे उभारले आहेत. या बसथांब्यांवरील बाकडे, स्टीलच्या जाळ्या, अ‍ॅल्युमिनियम शीटच्या मोठ्या प्रमाणात चोऱ्या होत आहेत. त्यामुळे ही बाकडे चोर सोडणार का, असा सवाल उपस्थित केला जात आहे.