खेळाडूंमध्ये देशाचे भविष्य घडविण्याची क्षमता; १३ व्या राज्य वुशू स्पर्धेला शानदार झाली सुरुवात

Pune : पुण्यातील येरवाडा विभागीय क्रीडा संकुल सभागृहात आयोजित १३ व्या राज्य सब ज्युनियर आणि ज्युनियर वुशु स्पर्धेच्या उद्‌घाटन सोहळ्यात दीप प्रज्वलन प्रसंगी उपस्थित मान्यवर.

किशोर बागडे लोकमत न्यूज नेटवर्कपुणे : खेळाडूंनी आयुष्यात नेहमी शिस्त बाळगायला हवी. वेळेचे व्यवस्थापन करीत अथक परिश्रमाच्या जोरावर ते देशाचे भविष्य घडविण्याची क्षमता बाळगतात, असे प्रतिपादन प्रसिद्ध उद्योजक नीलेश कानडे यांनी शनिवारी पुण्यात सुरू झालेल्या १३ व्या राज्य सब ज्युनियर आणि ज्युनियर गट दोन दिवसीय स्पर्धेच्या उद्घाटनप्रसंगी केले.

येरवाडा येथील विभागीय क्रीडा संकुल सभागृहात महाराष्ट्र ॲमॅच्युअर वुशू संघटनेच्यावतीने या स्पर्धेचे आयोजन करण्यात आले आहे. स्पर्धेत राज्यातील विविध जिल्ह्यांतील २५० खेळाडूंनी भाग घेतला. कानडे यांच्याहस्ते दीपप्रज्वलनाद्वारे स्पर्धेचे उद्घाटन करण्यात आले. अध्यक्षस्थानी महाराष्ट्र विधानसभा अध्यक्षांचे सचिव श्रीकांत पंडित होते. याप्रसंगी प्रमुख अतिथी म्हणून पुणे विभागाचे क्रीडा उपसंचालक युवराज नाईक, जिल्हा क्रीडा अधिकारी जगन्नाथ लकडे, कराटे ग्रॅन्डमास्टर सी. के. सिंग, आरएसएसचे विदर्भ प्रांत प्रचारक वैभव भगत, उद्योजक कुमार कोकील, अभिनेते स्वप्निल राऊत आदींची उपस्थिती होती. श्रीकांत पंडित यांनी खेळाडूंना मार्गदर्शन करताना आई-वडिलांचे संस्कार जोपासण्याचे, मोबाइल तसेच व्यसनापासून दूर राहण्याचे आणि खेळात शंभर टक्के प्रयत्न करण्याचे आवाहन केले.

महाराष्ट्र ॲमॅच्युअर वुशू संघटनेचे अध्यक्ष कुमार मसराम, चेअरमन माधव चितळे आणि महासचिव सुभाष उरकुडे यांनी सर्व पाहुण्यांचे स्मृतिचिन्ह आणि पुष्पगुच्छ देऊन स्वागत केले. स्पर्धेचा तपशील माधव चितळे यांनी मांडला. सूत्रसंचालन प्रा. रेखा राऊत यांनी केले, तर सुभाष उरकुडे यांनी आभार मानले. स्पर्धेचा समारोप आणि पुरस्कार वितरण आज, रविवारी सायंकाळी होणार आहे. स्पर्धा आयोजनासाठी डॉ. श्रीराम आगलावे, राजू शेंदरे, करण असवारे आदी परिश्रम घेत आहेत.