काश्मिरी वस्तूंसाठी पुण्यात कायमस्वरूपी विक्री केंद्र

मुरलीधर मोहोळ : सरहदतर्फे जम्मू-काश्मीर हस्तकला व विक्री महोत्सव

लोकमत न्यूज नेटवर्क

पुणे : पुणे महापालिका आणि श्रीनगर महापालिकेत झालेल्या सिस्टर सिटी करारावर प्रत्यक्ष काम केले जाणार आहे. काश्मिरी कृषी उत्पादने आणि हस्तोद्योग उत्पादनांच्या कायमस्वरुपी विक्रीसाठी पुणे महापालिका पुढाकार घेईल, अशी माहिती महापौर मुरलीधर मोहोळ यांनी दिली.

‘सरहद्द’तर्फे कोथरूड येथील अंबर हॉलमध्ये आयोजित जम्मू-काश्मीर हस्तकला व विक्री महोत्सवाच्या उद्घाटनप्रसंगी बोलत होते. याप्रसंगी झोन ३ च्या पोलीस उपायुक्त पौर्णिमा गायकवाड-कंधारे, काश्मीर हॉटेल अँड रेस्टारंट ओनर्स फेडरेशनचे अध्यक्ष वाहिद मलिक प्रमुख पाहुणे म्हणून उपस्थित होते.

मोहोळ म्हणाले, ''कलम ३७० काढल्यानंतर आणि कोरोनाच्या साथीत काश्मीरमधील शेतकरी व हस्तोद्योग क्षेत्रातील कामगारांवर बिकट आर्थिक स्थिती ओढवली. सरहद्दच्या माध्यमातून बाजारपेठ उपलब्ध करून दिल्याने पुणे आणि काश्मीर यामध्ये भावनिक बंधही तयार झाले आहेत. हे सांस्कृतिक बंध मजबूत व्हावेत, यासाठी आपण व्यापार व सांस्कृतिक केंद्र उभे राहण्यासाठी पुढाकार घेऊ.''

सरहदचे संस्थापक संजय नहार यांनी पुणे-श्रीनगर महापालिकांमध्ये झालेले सिस्टर सिटी ॲग्रिमेंट हा देशातील असा पहिलाच करार असल्याचे सांगितले. या प्रसंगी वंदे मातरम संघटनेचे सचिन जामगे, युवराज शहा, चित्रपट निर्माते नीलेश नवलाखा, सरहदचे शैलेश वाडेकर, डॉ. शैलेश पगारिया, लेखक संजय सोनवणी, डॉ. अमोल देवळेकर, असीम सरोदे, अण्णा राऊत, विजय कुंभार आदी मान्यवर उपस्थित होते.