एका वर्षात केवळ २०० खासगी रुग्णालयांची नोंद

पुणे : सध्या पुणे महानगरपालिकेमध्ये ७१५, जिल्हा परिषदेकडे ८२८ तर जिल्हा रुग्णालयाकडे ३२६ खासगी रुग्णालयांची नोंद करण्यात आली आहे. गेल्या आर्थिक वर्षामध्ये तिन्ही ठिकाणी मिळून केवळ २०० नवीन खासगी रुग्णालयांची नोंद झाली आहे. रुग्णालयांच्या नोंदणीसंदर्भात कोणतीही शंका आढळल्यास किंवा तक्रार नोंदवल्यास तातडीने कारवाई करण्याचे आदेश आरोग्य विभागातर्फे देण्यात आले आहे.

बॉम्बे नर्सिंग अ‍ॅक्टनुसार खासगी रुग्णालयांनी नोंदणी करणे बंधनकारक आहे. खासगी रुग्णालयांची शहरातील संख्या दिवसेंदिवस वाढत आहे. कोरोना काळात खासगी रुग्णालयांकडून, डॉक्टरांकडून रुग्णांकडून अवाजवी बिले आकारण्यात आल्याच्या अनेक तक्रारी समोर आल्या. बोगस रुग्णालयांना खीळ बसावी, यासाठी नोंदणीची तपासणी केली जाते का, असा प्रश्न उपस्थित केला जात आहे. रुग्णालयांची संख्या झपाट्याने वाढत असताना त्यांची नोंदणी केली जात आहे का, याबाबतचे नियम कडक करण्याची मागणीही होत आहे.

ग्रामपंचायत हद्दीतील खासगी रुग्णालयांची नोंदणी जिल्हा परिषदेकडे होते. नगरपालिका क्षेत्रातील रुग्णालयांनी जिल्हा शल्यचिकित्सकांकडे तर महानगरपालिका हद्दीतील खासगी रुग्णालयांची नोंदणी महापालिकेकडे केली जाते. दर तीन वर्षांनी नोंदणीचा परवाना नूतनीकरण करणे गरजेचे असते. नियमांची अंमलबजावणी न केल्यास दवाखान्यांवर कायद्यानुसार कारवाई करता येऊ शकते.

--------------

पुणे जिल्ह्यातील नोंदणीकृत खासगी रुग्णालयांची संख्या :

महानगरपालिका : ७१५

जिल्हा रुग्णालय : ३२६

जिल्हा परिषद : ८२८

------------------------------

रुग्णालयांची नोंदणी केलेली नसल्याचे आढळून आल्यास तातडीने कारवाई करण्याचे आदेश देण्यात आले आहेत. नागरिकांनीही अशी बाब आढळून आल्यास त्वरित तक्रार नोंदवावी.

- डॉ. अशोक नांदापूरकर, जिल्हा आरोग्य चिकित्सक

-----------------

बॉम्बे नर्सिंग अ‍ॅक्ट अंतर्गत नोंदणी केलेली नसल्यास रुग्णालयांना तीन वेळा नोटीस पाठवली जाते. त्यांचे म्हणणे ऐकून घेतले जाते. नोटिसींना समाधानकारक उत्तर न दिल्यास तातडीने कारवाई केली जाते.

- डॉ. मनीषा नाईक