इंदापूर (पुणे) : राष्ट्रवादी काँग्रेसचे नेते छगन भुजबळ यांच्याबद्दल अश्लील शेरेबाजी केल्याच्या आरोपावरून भाटनिमगाव येथील युवकावर इंदापूर पोलिस ठाण्यात शनिवारी (दि.१८) रात्री उशिरा गुन्हा दाखल करण्यात आला. रोहन संदीपान मगर पाटील (रा. भाटनिमगाव, ता. इंदापूर) असे आरोपीचे नाव आहे. माजी नगराध्यक्षा नलिनी पांडुरंग शिंदे यांनी त्याच्याविरुद्ध तक्रार दाखल केली आहे.
पोलिसांनी सांगितले की, फिर्यादी शिंदे व त्यांचे पती माजी नगरसेवक पांडुरंग हरिभाऊ शिंदे हे ओबीसी समाजाच्या वतीने सभा व आरक्षणासंदर्भात जनजागृती करत असतात. रोहन मगर पाटील याने ओबीसींचे नेते छगन भुजबळ यांच्याबाबत इन्स्टाग्रामवर अश्लील शेरेबाजी केल्याचा प्रकार पांडुरंग शिंदे यांना आढळून आला. तो त्यांनी फिर्यादीच्या नजरेस आणून दिला. त्यानंतर रात्री इंदापूर पोलिस ठाण्यात मगर पाटील यांच्या विरोधात तक्रार देण्यात आली.
याप्रकरणी पांडुरंग शिंदे यांच्यासह तेरा जणांनी रोहन मगर पाटील याच्यावर कारवाई करावी, अशी मागणी करणारे निवेदन पोलिस निरीक्षकांकडे पाठवले आहे. रोहन मगर पाटील हा भाजपचे नेते हर्षवर्धन पाटील व राजवर्धन पाटील यांचा समर्थक असल्याचे नलिनी शिंदे यांनी तक्रारीसोबत दिलेल्या रोहनच्या त्या सोशल मीडियाच्या अकाउंटच्या माहितीवरून स्पष्ट होत आहे.