लग्नात पारंपरिक साड्यांशिवाय रंगत नाही....( लाईफ स्टाईल पान)

लग्नामध्ये पैठणीबरोबरच ‘नारायण पेठी’ साडीचा प्रकारही हमखास वापरला जातो. ही साडी नेसायला अगदी सोपी आणि अतिशय हलकी दिसत असली तरी तिचा लूक अगदम ‘रॉयल’ दिसतो. या साडीच्या काठालाच जास्त महत्त्व आहे. ही साडी पाचवार, सहावार आणि नऊवार अशा तिन्ही प्रकारांत उपलब्ध होते. लग्नात वधू सहसा ही साडी परिधान करीत नसल्या तरी इतर महिला या साडीला आवर्जून प्राधान्य देतात. अशीच एक सोलापूरची खास पठडीतली साडी म्हणजे ‘इरकली’. या साडीचे आगळेवेगळे वैशिष्ट्य म्हणजे या साडीमध्ये सर्वच रंग गडद असतात. जे तुमच्या सौंंदर्याला चार चाँद लावतात. या साड्यांचे रंग नेहमीच्या साड्यांपेक्षा थोडे वेगळे असल्याने लग्नामध्ये ही साडी नेसायला महिलांना जास्त आवडते. तलम, मऊ मुलायम असणारी ही साडी एकदम गर्भरेशमी असते. यंत्रमाग आणि हातभाग अशा दोन स्वरूपात ही साडी विणली जाते. या साडीवरचा कशिदादेखील खूप प्रसिद्ध आहे. मूळची कर्नाटकची असलेली साडी आता महाराष्ट्राचीच झाली आहे...असाच एक साडीचा आणखी एक प्रकार म्हणजे ‘चंदेरी’... ही साडी नेसल्यानंतर ‘चम चम चंदेरी तेजाची न्यारी दुनिया’ अवतरली असल्याचेच फिलिंग येतं. ही मूळची ग्वाल्हेरजवळील चंदेरी गावची साडी. साडीची कड आणि बुट्ट्यांमध्येच तिचं सौंदर्य दडलेलं आहे. या साडीमध्ये चक्र आणि पान अशी डिझाईन्स पाहायला मिळतात. चंदेरीप्रमाणेच ’इंदूरी’ साडी देखील हल्ली लग्नामध्ये पाहायला मिळते.

’जिजामाता सिल्क’ हे नावही अनेकींना परिचित आहे. या साडीचा वेगळा असा खास चाहता वर्ग आहे. या साडीचं सौंदर्य त्याच्या बॉर्डर आणि साडीच्या काठात लपलेले आहे. या साड्या चिंतामणी आणि लाल रंगात अधिक तर पाहायला मिळतात. लग्नात विधींंमध्ये ही साडी हमखास वापरली जाते. या साडीप्रमाणेच ‘राजमाता सिल्क’देखील प्रसिद्ध आहे. अतिशय नाजूक प्रकारात मोडणारी ही साडी खूप सांभाळून वापरावी लागते. आता पुन्हा लग्नामध्ये ‘नऊवारी’ साडी नेसण्याचा एक ट्रेंड येऊ लागलाय. खास महाराष्ट्रीयन पारंपरिक मराठमोळ्या लूकमध्ये लग्न करण्याकडे वधूवरांचा कल वाढतोय...नऊवारी साडी लग्नात खूप वेळ परिधान करणं अनेकींना अवघड जात असल्याने इन्स्टंट नऊवारी साडी खरेदी करण्याला देखील वधूंकडून प्राधान्य दिले जाते. थोडक्यात काय, तर लग्नामध्ये पारंपरिक साड्यांशिवाय रंगत नाही!

-----------------------