आणखी पाणीकपात आठवडाभर नाही

पावसाने आणखी ओढ दिल्यास पुणेकरांवर लादावे लागणारे दिवसाआड पाण्याचे संकट तूर्तास टळले आहे. शहरात सध्या एक वेळ पाणी देण्यात येत

पुणे : पावसाने आणखी ओढ दिल्यास पुणेकरांवर लादावे लागणारे दिवसाआड पाण्याचे संकट तूर्तास टळले आहे. शहरात सध्या एक वेळ पाणी देण्यात येत असले, तरी धरणांच्या पाणलोट क्षेत्रात येत्या आठवड्याभरात चांगल्या पावसाची शक्यता असल्याने पाणी कपातीचा आढावा आणखी आठवड्याभरानंतर घेण्यात येणार असल्याची माहिती महापालिका आयुक्त विकास देशमुख यांनी आज दिली.
पुण्याला पाणी पुरवठा करणाऱ्या खडकवासला प्रणालीतील धरणांनी तळ गाठला आहे. धरणांमध्ये उपलब्ध पाणीसाठा आॅगस्टच्या पहिल्या आठवड्यापर्यंत राखीव ठेवण्यासाठी शहरात १२ टक्के पाणीकपात लागू केलेली आहे. पाऊस पडण्याच्या आशेने या कपातीचा आढावा एका आठवड्यानंतर घेण्यात येणार असल्याचे महापौरांनी जाहीर केले होते. याबाबत देशमुख म्हणाले, की पक्षनेत्यांनी येत्या ८ जुलै रोजी आढावा घेण्याबाबत बैठक बोलाविली आहे. शहराला कपात लागू करण्यापूर्वी पालिकेकडून दर दिवशी सुमारे १२५० एमएलडी पाण्याचे वितरण करण्यात येत होते. मात्र, आता हा आकडा आता ११२५ एमएलडीवर आणण्यात आला आहे. याशिवाय गळती थांबवून, काटकसरीने पाणी वाचवून पाण्याची बचत केली जात आहे. सध्या धरणात उपलब्ध १.५१ टीएमसी पाण्यावरच नियोजन केले जात आहे. (प्रतिनिधी)