पुणे : वाघोली परिसरातील बकोरी रोडवर एका तरुणावर कोयत्याने वार करून खून करण्यात आला. महेश डोके (वय २१) असे खून झालेल्या तरुणाचे नाव आहे. ही घटना मंगळवारी दुपारी दोनच्या सुमारास घडली. महेश डोके हा वाघोलीतील बीजीएस कॉलेज येथे बीबीएच्या शेवटच्या वर्षात शिक्षण घेत होता. वाडेबोल्हाई येथील एका वसतिगृहात वास्तव्यास होता.
याप्रकरणी कृष्णकांत कमलेशकुमार यादव (वय ३०, रा. आरव ब्लीस सोसायटी, वाघोली) यांनी लोणीकंद पोलिस ठाण्यात फिर्याद दिली आहे. फिर्यादी यादव हे मंगळवारी दुपारी घरी असताना, घराच्या खिडकीत बसून मोबाइल पाहत होते. त्यावेळी त्यांना एका व्यक्तीचा जोरजोरात ओरडण्याचा आवाज आला. त्यांनी खिडकीतून पाहिले तेव्हा एक तरुण हातात कोयता घेऊन दुसऱ्या तरुणाच्या मागे पळताना दिसला. समोर पळणाऱ्या तरुणाच्या अंगावर मोठे रक्त सांडलेले दिसले. त्यांनी खाली उतरून जोरात आवाज दिला. त्यावेळी कोयत्याने मारहाण करणारा तरुण दुचाकीवरून पळून गेला.
आरोपीने केलेल्या हल्ल्यात डोके गंभीर जखमी झाला होता. डोके याला खासगी रुग्णालयात दाखल केले. यादव यांना डोके याने आपले नाव सांगून, त्याच्या ओळखीतील एका व्यक्तीने आपल्याला मारल्याचे सांगितले. ससून रुग्णालयात डोके याला दाखल केले असता डॉक्टरांनी तपासून मृत्यू झाल्याचे सांगितले. घटनेची माहिती मिळताच लोणीकंद पोलिसांनी घटनास्थळी धाव घेतली. डोके याचा खून करण्यामागील कारण अद्याप समजू शकले नाही.
बकोरी रोड वाघोली येथे मंगळवारी दुपारी एका तरुणाचा कोयत्याने वार करून खून करण्यात आला आहे. याबाबत गुन्हा दाखल केला असून, आरोपीचा शोध पोलिस घेत आहेत. आरोपीला अटक केल्यानंतरच खुनामागील कारण स्पष्ट होऊ शकेल.
- विश्वजित काईंगडे, वरिष्ठ पोलिस निरीक्षक, लोणीकंद