परमवीर चक्र जवानांच्या पुतळ्यांसाठी महापालिका देणार ६० लाख

पुणे : घोरपडी येथील ‘नॅशनल वॉर मेमोरियल’ची दुरुस्ती आणि परमवीर चक्र मिळविलेल्या जवानांचे अर्धपुतळे बसविण्यासाठीचा ५९ लाख ६७ रुपये खर्च महापालिकेने करण्याबाबत स्थायी समितीच्या बैठकीत मान्यता देण्यात आली.

पुणे कॅन्टोन्मेंटच्या हद्दीत असलेल्या मोरवाडा जंक्शनजवळ लष्कराच्या वतीने नॅशनल वॉर मेमोरियल उभारण्यात आले आहे. या ठिकाणी लष्करातील शहीद सैनिक व अधिकारी यांचे स्मृतिस्तंभ आहेत. याच परिसरात संरक्षकविषयक म्युझियम, वॉरमेमोरियल, रणगाडे, युद्धामध्ये वापरलेली आयुधेही ठेवण्यात आली आहेत. २००६ मध्ये नॅशनल वॉर मेमोरियलचा पर्यटनस्थळामध्ये समावेश करण्यात आला. पीएमपीएमएलच्या पुणे दर्शन अंतर्गत या वॉरमेमोरियलला पर्यटक भेट देत असतात.

सध्या सदन कमांडच्या वतीने या नॅशनल वॉर मेमोरियलच्या नूतनीकरणाचे काम हाती घेण्यात आले आहे. याठिकाणी फायबर मटेरियल वापरून परमवीर चक्र मिळविलेल्या २१ लष्करी अधिकाऱ्यांचे अर्धपुतळे, आरसीसी पिलर व वॉल तसेच लायटिंग, साउंड सिस्टिम व अन्य सुशोभीकरणाच्या कामांचे नियोजन आहे. या सर्व कामांसाठी ६० लाख रुपये खर्च अपेक्षित असून, महापालिकेने यासाठी सहकार्य करावे असे आवाहन सदन कमांडच्या वतीने महापालिका आयुक्तांना करण्यात आले होते. त्यानुसार महापालिका आयुक्तांनी वर्गीकरणातून ५९ लाख ६७ हजार ४५१ रुपये नॅशनल वॉर मेमोरियलच्या नूतनीकरणासाठी उपलब्ध करून देण्याचा प्रस्ताव स्थायी समितीपुढे ठेवला होता. त्यास बैठकीत एकमताने मान्यता देण्यात आल्याची माहिती स्थायी समिती अध्यक्ष हेमंत रासने यांनी दिली.