आई व पोटातील बाळाला मिळाले जीवदान

काही दिवसांपूर्वी २१ वर्षीय गर्भवती महिलेचा चालत्या दुचाकीवरुन पोटावर पडुन अपघात झाला. महिलेला तात्काळ ससून सर्वोपचार रूग्णालयात दाखल करण्यात आले. स्त्रीरोग व शल्यतंत्रज्ञ यांनी तपासणी केली असता पोटावर बेंबीजवळ एका जखमेतून आतड्यांचा काहीसा भाग बाहेर आलेला आढळून आला. बाळाच्या ह्रदयाचे ठोके अजूनही ऐकू येत होते. डॉक्टरांना पोटामध्ये रक्तस्त्राव झाल्याची शक्यता वाटल्याने तात्काळ सोनोग्राफी करुन महिलेला आॅपरेशन थिएटरमध्ये हलविण्यात आले.

स्त्रीरोगतज्ज्ञांनी प्रथम सिझेरीयन करुन २१०० ग्रॅम वजनाचे बाळ सुरक्षित बाहेर काढले व नंतर शल्यतंत्रज्ञांनी ओमेंटम (आतड्याचा काही भाग) चा बाहेर आलेला भाग काढून टाकला. पूर्ण आतडे व पोटातील इतर अवयवांची तपासणी केली असता गर्भाशयाच्या पिशवीवर दोन ठिकाणी जखमा आढळून आल्या. बाळाच्या कमरेवरही दोन ठिकाणी जखमा आढळून आल्या आहेत.

शस्त्रक्रियेमध्ये स्त्रीरोगतज्ञ डॉ. शिल्पा नाईक, डॉ. तेजस्विनी काळे, डॉ. स्नेहल तिनईकर आदींनी स्त्रीरोग व प्रसुती विभाग प्रमुख डॉ. रमेश भोसले यांच्या मार्गदर्शनाखाली सहभाग घेतला. शल्यतंत्रज्ञ टीम डॉ. किरण जाधव यांच्यासह डॉ. दयानंद, डॉ. मनोज यांनीही यासाठी परिश्रम घेतले. डॉ. आरती किणीकर यांच्या चमुने नवजात बाळावर उपचार केले, असे अधिष्ठाता डॉ. मुरलीधर तांबे यांनी सांगितले.