पिंपरी : Buldhana Bus Accident- समृद्धी महामार्गावर झालेल्या भीषण अपघातात पिंपळे सौदागर येथील वनकर कुटुंब उद्धवस्त झाले आहे. येथील परिणीत वनकर यांची आई शोभा वनकर (वय ६६) पत्नी वृषाली वनकर(वय ३८), व मुलगी ओवी वनकर (वय ०२) या तिघींचाही समृद्धी महामार्गावरील अपघातात दुर्दैवी मृत्यू झाल्याची माहिती आली. या घटनेमुळे वनकर कुटुंबीयावर दुःखाचा डोंगर कोसळला आहे. तर जरवरी सोसायटीत शोककळा पसरली होती.
वनकर कुटुंबिय ८ जूनला नातेवाईकांच्या भेटीसाठी गावी गेले होते. त्यांचे मुळगाव हे चंद्रपूर हे होते. परिणीत हे कामामुळे लगेच परतले होते. शुक्रवारी (दि.३०जून)या वर्ध्याहून आपल्या मुलीला भेटून परत निघाल्या होत्या. तसेच त्याच गाडीत वृषाली व ओवी या यवतमाळहून वृषाली यांच्या बहिणीला भेटून परत निघाल्या होत्या. रात्री जेवन झाल्यानंतर परिणीत आणि वृषाली यांचा फोन झाला होता. सकाळी चारच्या सुमारास बसच्या अपघाताची माहिती मिळाल्यानंतर परिणीत वनकर हे बुलढाण्याला गेले.
मे महिन्यांतच झाला होता वाढदिवस...
ओवीचा दुसरा वाढदिवस ११ मेला सर्व कुटुंबियांनी जल्लोषात साजरा केला होता. शोभा वनकर व त्यांची सुन वृषाली यांचा स्वभाव हा मनमिळावू होता. तसेच त्या सर्वांची आस्थेने विचारपूसही करत असत असल्याचे त्यांच्या शेजाऱ्यांनी सांगितले. शोभा वनकर यांच्या पतीचे कोरोनात निधन झाले होते. त्यानंतर त्यांच्या कुटुंबात ओवीच्या आगमनाने आनंद पसरला होता. दोन दिवसांपूर्वीच परत येत आहोत. कामवाल्या बाईकडून घराची साफसफाई करून घ्या, असे शोभा वनकर यांचे शेजारी राहणाऱ्या बिरारी कुटुंबाशी बोलणे झाले होते.
धार्मिक कुटुंब...
वनकर कुटुंबीय धार्मिक होते. शोभा वनकर या सोसायटीतील मंदिराची पुजा-अर्चा नेहमी करत असत. तसेच त्या भजनी मंडळाच्या सभासदही होत्या. सोसायटीच्या उपक्रमात त्या हिरीरीने सहभाग घ्यायच्या. असे जरवरी सोसायटीचे चेअरमन रविंद्र पाटील यांनी सांगितले.