- किरण शिंदे
पुणे : कपिल शर्मा असल्याचे सांगून एका महिलेला फोन करून त्रास देणाऱ्या एका व्यक्ती विरोधात गुन्हा दाखल करण्यात आला. पुण्यातील येरवडा पोलीस स्टेशनच्या हद्दीत हा संपूर्ण प्रकार घडला. एका 27 वर्षीय महिलेने या प्रकरणी तक्रार दिली आहे. त्यानुसार कपिल शर्मा नामक एका अनोळखी व्यक्तीविरोधात येरवडा पोलीस ठाण्यात भादवी 354 354 (अ) 354(ड) 504 आणि 509 नुसार गुन्हा दाखल करण्यात आलाय.
फिर्यादी महिला या पुण्यातील घोरपडी परिसरात राहण्यासाठी आहेत. तर कल्याणी नगर परिसरात त्यांचे ऑफिस आहे. 22 नोव्हेंबर रोजी फिर्यादी या त्यांच्या ऑफिसमध्ये असताना त्यांच्या मोबाईलवर अनोखी मोबाईल क्रमांकावरून एक फोन आला. मै कपिल शर्मा बात कर रहा हू, पहचाना नही क्या? उस दिन तो नाईट को ओयो हॉटेल मे मिले थे, दीपक है क्या? असे बोलून फिर्यादी यांच्या स्त्री मनास लज्जा उत्पन्न केली.
दरम्यान फिर्यादी यांनी संपूर्ण प्रकाराबाबत आपल्या पतीला माहिती दिली. फिर्यादी यांच्या पतीने संबंधित क्रमांकावर फोन करून विचारणा केली असता त्यांना देखील शिवीगाळ करण्यात आली. तेरी वाइफ ओयो मे जाती है, गलत काम करती है, इसको देखो असे म्हणत त्यांना अश्लील भाषेत शिवीगाळ करण्यात आली. दरम्यान या संपूर्ण प्रकारानंतर फिर्यादी महिलेने येरवडा पोलीस स्टेशन गाठत तक्रार दिली. पोलिसांनी या प्रकरणी गुन्हा दाखल केला असून अधिक तपास सुरू आहे.