पुणे : कोंढवा येथे महापालिकेने हज हाऊस बनविण्याचे काम सुरू केले आहे. या धार्मिक स्थळाला विरोध करीत धार्मिक भावना दुखावणे आणि जातीय दंगल भडकविण्याच्या उददेशाने भाषण करून ते सोशल मीडियावर प्रसारित केल्याप्रकरणी समस्त हिंदू आघाडीचे कार्याध्यक्ष मिलिंद एकबोटे यांच्यावर कोंढवा पोलीस स्टेशनमध्ये गुन्हा दाखल करण्यात आला आहे. या गुन्ह्यात एकबोटेंना शुक्रवारी (दि. १२) अटकपूर्व जामीन मंजूर केला.
अतिरिक्त सत्र न्यायाधीश जी. पी. आगरवाल यांच्या कोर्टाने हा आदेश दिला. संभाजी बिग्रेडतर्फे या प्रकरणी फिर्याद देण्यात आली. मिलिंद एकबोटे यांच्यातर्फे अटकपूर्व जामीन मिळावा म्हणून अ‍ॅड. एस. के. जैन, अ‍ॅड. अमोल डांगे यांनी कोर्टात अर्ज दाखल केला होता.
या प्रकरणी त्यांच्या विरुद्ध शाहाफाजील मोईनुदद्दीन सिददीकी आणि सतीश भास्कर काळे यांनी फिर्याद दाखल केली आहे. या प्रकरणी अटकपूर्व जामीनासाठी म्हणून एकबोटे यांनी अर्ज दाखल केला होता. अ‍ॅड. एस. के. जैन आणि अ‍ॅड. अमोल डांगे यांनी कोर्टात युक्तिवाद करताना सांगितले की या प्रकरणी उशीरा एफआयआर दाखल करण्यात आला. अर्जदार यांनी फक्त लक्षात आणून दिले की, हज हाऊस या गोष्टीची बांधणी सिव्हिल आणि कल्चरल सेंटरच्या नावाखाली करण्यात येत आहे. संबंधित जागा पुणे महानगरपालिकेच्या ताब्यातील आहे. अर्जदार तपासास सहकार्य करण्यास तयार आहेत. पोलिस कोठडीतील चौकशीची गरज नाही.
त्यामुळे या प्रकरणी अर्जदाराला अटकपूर्व जामीन मंजूर करण्यात यावा. त्यानुसार कोर्टाने मिलिंद एकबोटे यांचा जामीन मंजूर करून पंधरा हजार रुपयांच्या वैयक्तिक जातमुचलक्यावर सोडण्याचा आदेश दिला. अर्जदाराने साक्षी पुराव्यात हस्तक्षेप करु नये या अटीवर न्यायालयाने मिलिंद एकबोटे यांना अंतरिम जामीन मंजूर केला.
---------------------------------------