मंचर (पुणे) : पतीवर मृत्यूचे सावट असून त्यावर उपाय म्हणून व्हिडीओ कॉल करीत महिलेला विवस्त्र होण्यास मांत्रिकाने सांगितले. त्यानंतर त्याचे स्क्रीन शॉट काढून महिलेला ब्लॅकमेल करीत तिच्यावर वारंवार बलात्कार करण्यात आला. याप्रकरणी भोंदू मांत्रिक विक्रम नामदेव गायकवाड (रा. बुरूडगाव रोड, जि. नगर) यांच्या विरोधात गुन्हा दाखल झाला आहे. मांत्रिक फरार झाला आहे.
मंचर पोलिसांनी दिलेल्या माहितीनुसार पीडित महिलेची भोंदू मांत्रिक विक्रम नामदेव गायकवाड यांच्याबरोबर ओळख झाली होती. जानेवारी ते सप्टेंबरपर्यंत पीडित महिलेवर मांत्रिकाने तिला ब्लॅकमेल करीत वेळोवेळी बलात्कार केला. मी मोठा मांत्रिक व ब्रह्मचारी आहे, असे भोंदू मांत्रिकाने महिलेला खोटे सांगितले. तिचा विश्वास संपादन केला. संबंधित महिला व तिच्या पतीवर मृत्यूचे सावट असून, त्यावर उपाय म्हणून व्हिडीओ कॉल करून महिलेला विवस्त्र होण्यास सांगितले. महिलेचे विवस्त्र अवस्थेतील फोटोचे स्क्रीन शॉट काढण्यात आले. हे फोटो महिलेला दाखवून तिला ब्लॅकमेल करण्यात आले.
हे फोटो महिलेच्या पतीला दाखवून संसार मोडण्याची भीती दाखवण्यात आली. महिलेची इच्छा नसताना तिला वारंवार मारहाण करीत बलात्कार करण्यात आला. मी मार्कोस कमांडो असून, एन्काउंटर स्पेशालिस्ट आहे. या प्रकाराबाबत कोणाला काही सांगितले तर भररस्त्यात गोळी घालून ठार मारण्याची धमकी या भोंदू मांत्रिकाने महिलेला दिली.
पतीपासून घटस्फोट देण्याची, तसेच पती व मुलांना जिवे मारण्याची धमकी या मांत्रिकाने दिली व वेळोवेळी मारहाण करीत बलात्कार केला. संबंधित महिलेने यासंदर्भात मंचर पोलिस ठाण्यात धाडस करून फिर्याद दिली आहे. पोलिसांनी भोंदू मांत्रिक विक्रम नामदेव गायकवाड (वय ३७, रा. जयभवानी निवास बुरूडगाव रोड, जि. अहमदनगर) याच्या विरोधात बलात्काराचा गुन्हा दाखल केला आहे. मांत्रिक फरार झाला असून, पोलिस त्याचा कसून शोध घेत आहेत. पुढील तपास महिला पोलिस उपनिरीक्षक रूपाली पवार करीत आहेत.