यंदाचा पावसाळाही करू या ट्रेंडी

रेनकोट म्हटले की फक्त पावसापासून संरक्षण असा समज गेल्या काही दिवसांपासून बदलायला लागला आहे. आजची तरुणाई यातही नावीन्यता शोधून सर्वांपेक्षा आपण कसे वेगळे आहोत, आपली आवडीनिवडीची छाप पाडण्याचा प्रयत्न करताना दिसते. फॅशन जगतात प्रत्येक ऋतूनुसार दर वेळेला कपड्यांमध्ये नवे ट्रेंड पाहायला मिळतात. हे नवे ट्रेंड आता रेनकोटमध्येही पाहायला मिळत आहेत. सिंथेटिक कापड, पारदर्शक कापड या सोबतच नवे डिझाईन, पॅटर्नला रेनकोट खरेदी करताना आजची तरुणाई महत्त्व देताना दिसत आहे. रेनकोटविक्री करणाऱ्या व्यापाऱ्यांनीही हा बदल ओळखला असून त्यानुसार नव्या पद्धतीचे रेनकोट उपलब्ध असल्याचे आपल्याला दिसतील. वयानुसार विविध पद्धतीचे रेनकोट बाजारात उपलब्ध आहेत. ज्येष्ठांकडून पारंपरिक प्लॅस्टिक तसेच सिंथेटिक मटेरिअलचे शर्ट आणि पॅन्ट किंवा पोंचू या पद्धतीच्या रेनकोटला पसंती दिल्या जात आहे. तर मध्यमवयीन नागरिकांकडूनही याच पद्धतीच्या रेनकोटला पसंती दिल्या जात असल्याचे बाजारातील चित्र आहे. मात्र, कॉलेजमध्ये जाणारे तरुण, तरुणी आणि लहान मुलांमध्ये रेनकोट खरेदी करतानाही आजच्या फॅशनच्या नव्या बदलांचा विचार केला जात आहे. पूर्वी पाश्चात्य देशांमध्ये हे बदल पाहायला मिळत होते. आता ग्लोबलायझेशनमुळे विविध देशांच्या फॅशनपद्धती माहीत झाल्यामुळे त्याच पद्धतीची मागणी आजचे तरुण करताना दिसत आहेत.

रेनकोटमध्ये डोक झाकणारे हूड हे अॅडजेस्टेबल असते. साधारणत: त्रिकोणी आणि गोलाकार असे हूड असणारे रेनकोट बाजारात असतात. नव्या फॅशन ट्रेंडनुसार मुख्य रेनकोटपासून वेगळे होणारे हूड असलेल्या रेनकोटला बाजारात मागणी आहे. पावसात घालायला आणि काढायला सोपे असलेले बटन असलेले शर्टसारख्या रेनकोटला मुलांची पसंती आहे. हे रेनकोट खरेदी करताना रंग, कापडाचा दर्जाला महत्त्व दिले जाते. यासोबतच लांब असलेले पोंचू प्रकारातील रेनकोटला मुले आणि मुली तसेच महिला प्राधान्य देत आहे. पोंचू लांब असल्याने दुचाकी चालवताना गैरसोय होत नाही. महिलांकडून पारदर्शक पोंचू घेण्याला प्राधान्य दिले जाते. पोंचू वजनाने हलके असते. यातून मुलींना विविध रंगाचे, डिझाइन उपलब्ध असल्याने त्यांना रेनकोट घालून शो ऑफ करता येत असल्याने मुली या प्रकारच्या रेनकोटला प्राधान्य देत आहेत. मुलांकडून जॅकेट पद्धतीच्या तसेच दोन्ही बाजूने वापरता येईल अशा रेनकोटला प्राधान्य दिले जात आहे. दुचाकी चालवताना आपण आकर्षक दिसावे यासाठी जॅकेट, हूड आणि स्टायलिश रेनकोटची मागणी तरुण करत आहेत. ही मागणी करताना विशेष रंगाचा आणि डिझाइनचा विचार प्राधान्याने होत आहे. सर्वात महत्त्वाचे म्हणजे मोबाईल, वॉलेट, तसेच इतर यांत्रिक वस्तूंचे संरक्षण करण्यासाठी विशेष पद्धतीचे खिचे असलेल्या रेनकोटलाही मागणी आहे. रेनकोट घेताना पाठीवरच्या बॅगेचेही पाण्यापासून संरक्षण होईल या दृष्टीने बॅगकव्हरची मागणीही केली जाते.

रेनकोट हा केवळ पावसापासून बचाव करण्यापुरता राहिला नसून त्यातून शरीरयष्टी कशी आकर्षक दिसेल याचाही विचार आजची तरुणाई करत आहे. यामुळे विरील रेनकोटमधील नव्या ट्रेंडचा विचार करून त्या पद्धतीचे रेनकोट खरेदी करून यंदाचा पावसाळा या माध्यमातून ट्रेंडी केला जात आहे.

-निनाद देशमुख