विहिरीत पडलेला बिबट्या जेरबंद

आंबेगाव तालुक्याच्या पूर्व भागातील झापवस्ती येथे सोमवारी पहाटे अंदाजे पाच वाजता शिकारीचा पाठलाग करताना अडीच वर्षांचा बिबट्या विहिरीत पडला.

अवसरी : आंबेगाव तालुक्याच्या पूर्व भागातील झापवस्ती येथे सोमवारी पहाटे अंदाजे पाच वाजता शिकारीचा पाठलाग करताना अडीच वर्षांचा बिबट्या विहिरीत पडला. मात्र, आठ तासांच्या अथक प्रयत्नानंतर बिबट्याला जिवंत बाहेर काढण्यात आले. बिबट्या निवारा केंद्र माणिकडोहच्या डॉक्टरांच्या पथकाने बिबट्याला पडकले, त्याला पाहण्यासाठी ग्रामस्थांनी मोठी गर्दी केली होेती.
येथील शेतकरी बबन जाधव व सुभाष जाधव यांच्या शेतालगत एक विहीर आहे. बबन जाधव हे विहिरीतील पाणी किती आले, वीज आली का? हे पाहण्यासाठी विहिरीजवळ गेले असता, त्यांना विहिरीतून ओरडण्याचा आवाज आला. त्यांनी विहिरीत डोकावून पाहिले असता, त्यांना विहिरीत बिबट्या दिसला. बबन जाधव यांनी आपल्या भावाला विहिरीत बिबट्या असल्याचे सांगितले. त्यानंतर सुभाष जाधव यांनी लगेचच गावचे सरपंच विठ्ठल टिंगरे यांना विहिरीत बिबट्या पडल्याचे कळविले. त्यानंतर सरपंच विठ्ठल टिंगरे यांनी शिरूर वनविभागाला कळविले. त्यानंतर बिबट्या निवारा केंद्र व डॉ. अतुल देशमुख, महेंद्र ढोबे, डॉ. गोरक्ष सोनवणे यांच्या टिमने सकाळी ८ वाजता विहिरीमध्ये प्रथम लोखंडी कॉट टाकली व विहिरीच्या कडेने काटेरी झुडुप टाकले. मात्र, प्रयत्न करूनही बिबट्या कॉटवर येईना, त्यानंतर दुपारी साडेबारा वाजता जेसीबीच्या साहाय्याने वन विभागाने पिंजरा विहिरीत सोडला. पहिल्या वेळेला बिबट्या पिंजऱ्यात येण्यास अपयश आले. त्यानंतर पुन्हा विहिरीत पिंजरा सोडला. मात्र अथक प्रयत्नांनंतर बिबट्या पिंजऱ्यात गेला आणि वनविभागाच्या अधिकाऱ्यांनी व डॉक्टरांनी सुटकेचा नि:श्वास सोडला.
बिबट्या पकडण्यासाठी वनपरिक्षेत्र अधिकारी डी. जी. फाफाळे, डी. बी. सपकाळ, डी. वाय. मुरके, डॉ. अतुल देशमुख, डॉ. गोरक्ष सोनवणे, महेंद्र ढोमे व सरपंच विठ्ठल टिंगरे व ग्रामस्थ, सागर हिंगे, कैलास जाधव यांचे सहकार्य लाभले.
बिबट्याला जिवंत पकडण्यात वनविभागाला यश आल्याने ग्रामस्थांनी वनविभागाचे त्यांच्या डॉक्टरांचे अभिनंदन केले.

आंबेगाव तालुक्याच्या पूर्व भागात उसाचे क्षेत्र मोठ्या प्रमाणात वाढल्याने बिबटे व अन्य वनप्राणी यांचा वावर वाढला आहे. मात्र, तालुक्यातील उसाचे क्षेत्र तुटून गेल्याने बिबट्यांना लपण्यासाठी जागा नसल्याने बिबटे खाद्य शोधण्यासाठी मानव वस्तीकडे वळू लागले आहेत. त्यामुळेच बिबट्यांचा वावर वाढल्याने तालुक्यात भीतीचे वातावरण आहे.

४बिबट्या निवारा केंद्र माणिक डोह या ठिकाणात यापूर्वी २९बिबटे ठेवण्यात आले आहे. त्यात अजून बिबट्या वाढल्याने आता
या निवारा केंद्रात ३० बिबटे झाल्याची माहिती वनविभागाच्या
अधिकाऱ्यांनी दिली.