कोंढव्यात काँग्रेसच्या रईस सुंडके यांची सरशी

कोंढवा येथील पोटनिवडणुकीत काँग्रेस-राष्ट्रवादी काँग्रेसचे उमेदवार रईस सुंडके यांनी १ हजार ४६७ मतांनी विजय मिळविला़ सुंडके यांना ५ हजार १३४ मते मिळाली तर शिवसेनेचे

हडपसर : कोंढवा येथील पोटनिवडणुकीत काँग्रेस-राष्ट्रवादी काँग्रेसचे उमेदवार रईस सुंडके यांनी १ हजार ४६७ मतांनी विजय मिळविला़ सुंडके यांना ५ हजार १३४ मते मिळाली तर शिवसेनेचे सोमनाथ हारपुडे यांना ३ हजार ६६७ मते मिळाली़ या प्रभागात शिवसेनेच्या गेल्या २० वर्षांच्या वर्चस्वाला धक्का बसला आहे़
कोंढवा पोटनिवडणुकीत प्रथमपासूनच काँग्रेस आणि शिवसेना अशी लढत होती़ प्रचारात सर्वांनीच जोर लावला होता़ रविवारी झालेल्या मतदानाला नागरिकांचा अतिशय कमी प्रतिसाद मिळाल्याने ही निवडणूक अटीतटीची होईल, अशी अपेक्षा होती़ पण, काँग्रेसच्या सुंडके यांनी सहज विजय नोंदविला़
वानवडीतील महादजी शिंदे शाळेत सोमवारी सकाळी दहा वाजता मतमोजणीला सुरुवात झाली़ तेव्हा पहिल्या फेरीत शिवसेनेने आघाडी घेतली होती़ त्यांची ही आघाडी दुसऱ्या फेरीतही कायम होती़ मात्र, तिसऱ्या फेरीपासून काँग्रेसने आघाडी घेऊन विजयाची मुहूर्तमेढ रोवली. रईस सुंडके यांना ५१३४ मते मिळाली. शिवसेनेचे उमेदवार सोमनाथ हारपुडे यांना ३६६७ मते मिळाली. मनसेचे उमेदवार अमोल शिरस यांना ३११५, तर भाजपाचे उमेदवार सतपाल पारगे यांना २६११, एमआयएमचे उमेदवार अझर मणियार यांना १५८४, अपक्ष महम्मद खान (१७), राज फय्याज मुस्ताक (३४) मते मिळाली. तर २०१ जणांनी ‘नोटा’चा (यापैकी एकही नाही) वापर केला. कोंढवा पोटनिवडणुकीचा निकाल सोमवारी सकाळी १२ वाजता स्पष्ट झाला. या विजयामुळे शहर काँग्रेस आणि राष्ट्रवादी काँग्रेसमध्ये उत्साहाचे वातावरण तयार झाले आहे.

आमदारांच्या मतदारसंघात दुसरा पराभव
भाजपचे आमदार योगेश टिळेकर यांनी या निवडणुकीत खूप लक्ष घातले होते़ प्रचारासाठी त्यांनी कोंढव्यात फेरी काढल्या़ तरीही भाजपचा उमेदवार चौथ्या क्रमांकावर गेला़ विधानसभा निवडणुकीनंतर टिळेकर यांच्या मतदारसंघात भाजपचा हा दुसरा पराभव ठरला़ यापूर्वी महंमदवाडी येथील पोटनिवडणुकीतही भाजप उमेदवार चौथ्या क्रमांकावर होता़
या पोटनिवडणुकीच्या निमित्ताने एमआयएम पुणे शहरात प्रथमच निवडणुकीच्या रिंगणात उतरली होती़ मुस्लिमबहुल असलेल्या या परिसरात एमआयएमच्या उमेदवाराला कसा प्रतिसाद मिळतो याकडे सर्वांचेच लक्ष होते़ अझर मणियार यांना केवळ १ हजार ५८४ मतांवर समाधान मानावे लागले़ ते पाचव्या क्रमांकावर फेकले गेले़
शिवसेनेला धक्का
शिवसेनेचे भरत चौधरी यांचे सदस्यत्व जातपडताळणीत रद्द झाल्याने ही पोटनिवडणूक लागली होती़ महापालिकेतील शिवसेनेच्या नगरसेवकांची संख्या वेगवेगळ्या कारणांनी कमी झाली होती. या पोटनिवडणुकीत शिवसेनेला आपले संख्याबळ पुन्हा वाढविण्याची संधी मिळाली. मात्र शिवसेनेला गड राखून ठेवता आला नाही. गेली २० वर्षे सत्ता असणाऱ्या शिवसेनेच्या बालेकिल्ल्याला धक्का लागला आहे़


महापालिकेतील पक्षीय बलाबल
पोटनिवडणुकीनंतर महापालिकेतील पक्षीय बलाबल
राष्ट्रवादी
काँग्रेस - ५४
काँग्रेस - २९
मनसे - २८
भाजप - २६
शिवसेना - १२
रिपाइं - ०२
एकाचे नगरसेवक पद रद्द
एकूण - १५२