खडकवासला प्रकल्पात एका दिवसात चार टीएमसी पाणी वाढले

पुणे : खडकवासला धरण प्रकल्पात एका दिवसात चार टीएमसी पाणी वाढले आहे. बुधवारी (दि. २१) रोजी १२.२३ टीएमसी साठा होता. तो गेल्या २४ तासांत चार टीएमसीने वाढून १६.३८ टीएमसी साठा झाला असून, प्रकल्पात एकूण ५६.१८ टक्के साठा झाला आहे. तर खडकवासला धरण भरण्याच्या मार्गावर आहे. त्यामुळे खडकवासलातून गुरुवारी दुपारी २४०० क्यूसेकने तर, सायंकाळी सहा वाजता ५ हजार क्यूसेकने तर, रात्री आठ वाजता १० हजार ९६ क्यूसेकने पाणी सांडव्यात सोडण्यास सुरुवात झाली आहे.

पुणे जिल्ह्यातील मुळशी धरण क्षेत्रात ढगफुटीसदृश पाऊस झाला आहे. ताम्हिणी परिसरात गेल्या २४ तासांत तब्बल ४६८ मिलिमीटर पाऊस झाला आहे. धरणात पातळीत ७ फुटांने (३८.६० टक्के साठा) वाढ झाली आहे. खडकवासला प्रकल्पातील टेमघर धरण क्षेत्रात गुरुवारी सर्वात जास्त १९० मिलिमीटर पावसाची नोंद झाली आहे. त्याखालोखाल वरसगाव धरण क्षेत्रात १०१ मिलिमीटर तर पानसेत धरण क्षेत्रात ९६ मिलिमीटर पाऊस झाला असून, खडकवासला परिसरात १५ मिलिमीटर पावसाची नाेंद झाली आहे.

चौकट

दोन धरणे शंभर टक्के तर, बारा धरणांत ५० टक्क्यांच्या पुढे साठा

जिल्ह्यातील कळमोडी आणि कासारसाई ही दोन धरणे शंभर टक्के भरली आहेत. तर खडकवासला धरण (९६.१७ टक्के) भरण्याच्या मार्गावर आहे. तसेच आंध्रा धरण ८६.३० टक्के, वडिवळे ७८.१५ टक्के, पानशेत ६०.६३ टक्के, भामा आसखेड ५५.८२ टक्के, वडज ५२.८२ टक्के, वरसगाव ५१.९४ टक्के, वीर ४९.८४ टक्के, नीरा देवघर ४८.३६ टक्के, येडगाव ४७.६७ टक्के, डिंभे ४३.७३ टक्के भरले आहे.

चौकट

जिल्ह्यातील प्रमुख धरणांमधील उपयुक्त पाणीसाठ्याची माहिती

धरण - प्रकल्प साठा - सध्याचे टीएमसी

खडकवासला - १.९७ - १.७५

वरसगाव - १२.८२ - ५.८९

पानशेत - १०.६५ - ५.७९

टेमघर - ३.७१ - १.११

पवना - ८.५१ - ४.६९

कळमोडी - १.५१ - १.५१

चासकमान - ७.५८ - ३.२०

आंध्रा - २.९२ - २.५२

मुळशी - १८.४७ - ७.७८

नीरा देवघर - ११.७३ - ५.६७

वडिवळे - १.०७ - ०.८४

भाटघर - २३.५० - ८.२९

वडज - १.१७ - ०.६२

वीर - ९.४१ - ४.६९

उजनी - ५३.५७ - १.००

डिंभे - १२.४९ - ५.४६

भामा आसखेड - ७.६७ - ४.२८

कासारसाई - ०.५७ - ०.५५

येडगाव - २.८० - ०.९३

घोड - ५.४७ - ०.४४

विसापूर - ०.९० - ०.०८

पिंपळगाव जोगे - ३.८९ - ०००

माणिकडोह - १०.१७ - २.०८

गुंजवणी - ३.६९ - १.८९

फोटो - खडकवासला