पुणे : पार्टटाइम जॉबचे आमिष दाखवून एका महिलेची फसवणूक केल्याची घटना पुण्यात घडली आहे. याबाबत वडगाव शेरी परिसरात राहणाऱ्या ३१ वर्षीय महिलेने फिर्याद दिली.
पोलिसांनी दिलेल्या फिर्यादीनुसार, हा प्रकार १७ ऑगस्ट २०२३ रोजी घडला. तक्रारदार महिलेला अनोळखी क्रमांकावरून ‘पार्टटाइम नोकरी करण्यास इच्छुक आहात का?’ असा मेसेज आला. महिलेने होकार दिला असता वेगवेगळे टास्क पूर्ण केल्यास चांगला परतावा मिळेल, असे सांगून त्यांना टेलिग्राम ग्रुपमध्ये सामावून घेतले. सुरुवातीला काही प्रमाणात मोबदला देऊन त्यांचा विश्वास संपादन केला. त्यानंतर प्रीपेड टास्क, व्हीआयपी टास्क अशी वेगवेगळी कारणे सांगून तक्रारदार महिलेकडून तब्बल १२ लाख ७५ हजार रुपये उकळले. काही कालावधीनंतर नफ्याचे पैसे मिळत नसल्याने विचारणा केली असता महिलेला कोणताही प्रतिसाद न मिळाल्याने आपली फसवणूक झाल्याचे लक्षात आले. याप्रकरणी चंदननगर पोलीस ठाण्यात गुन्हा दाखल करण्यात आला असून वरिष्ठ पोलिस निरीक्षक लांडगे पुढील तपास करत आहेत.