गजा मारणे याची खुनाच्या गुन्ह्यातून निर्दोष मुक्तता

पुणे : टोळीयुद्धातून अमोल बधेच्या खून प्रकरणात मोक्काअंतर्गत कारवाई केलेल्या गजानन पंढरीनाथ मारणे याच्यासह २० साथीदारांची न्यायालयाने निर्दोष मुक्तता केली.

विशेष मोक्का न्यायाधीश ए. वाय. थत्ते यांनी हा न्यायनिवाडा केला असून, पुराव्याच्या अभावी सदरील आरोपींची मुक्तता केली असल्याचे मत न्यायालयाने नोंदवले आहे. प्रस्तुत प्रकरणात आरोपीतर्फे अँड सुधीर शहा, अँड विजयसिंह ठोंबरे, अँड विपुल धुशिंग व अँड सिद्धार्थ पाटील यांनी कामकाज पाहिले आहे.

गजानन मारणे (वय ४९), रूपेश मारणे (वय ३१), मंदार ऊर्फ विकी सुरेश बांदल ( वय २६), बालाजी कमलाकर कदम (वय २२), सागर श्रीरंग डिम्बळे (वय २४), विक्रम विलास समुद्रे (वय २४), विशाल ऊर्फ गोट्या श्रीरंग डिम्बळे (वय २५), राहुल उर्फ बंटी रामकृष्ण कळवणकर (वय २१), तुषार बाळासाहेब बधे (वय २५), आकाश राजेश अवचर (वय २१), अक्षय राजू वेडे (वय २१), प्रतीक प्रकाश जाधव (वय २३), स्वप्नील मिलिंद मापारे (वय २३), ओंकार संजय जाधव (वय २१), विशाल विलास धुमाळ (वय २८), योगेश नारायण मोहिते (वय २७), बाळकृष्ण उर्फ पांड्या लक्ष्मण मोहिते ( वय ३०), सोमप्रशांत मधुकर पाटील (वय ४२), सागर कल्याण रजपूत, राकेश गायकवाड ऊर्फ बाब्या बुरजी, तानाजी कदम, निखिल दुगाई, पप्पू ऊर्फ अतुल लक्ष्मण कुडले आणि सचिन ताकवले अशी निर्दोष सुटका केलेल्यांची नावे आहेत.

याप्रकरणी संतोष कांबळे यांनी विश्रामबाग पोलीस ठाण्यात फिर्याद दिली होती. फिर्यादी संतोष कांबळे आणि मयत अमोल बधे हे रेकॉर्डवरील गुन्हेगार आहेत. हे दोघे नीलेश घायवळ या गुंडाचे सहकारी व टोळी सदस्य आहेत. नीलेश घायवळ टोळीचे गजा मारणे टोळीशी पूर्ववैमनस्य आहे. अमोल बधेचा २९ नोव्हेंबर २०१४ रोजी नवी पेठेतील वैकुंठ स्मशानभूमी रस्त्यावरील कलावती मंदिराजवळ टोळीयुद्धातून खून झाला होता. पोलिसांनी याप्रकरणात ११ लोखंडी कोयते, ३ गावठी पिस्तुले, १० मोबाईल हँडसेट, २ जिवंत काडतुसे असा इतर साहित्य मिळून ५ लाख ३२ हजार ४०० रुपयांचा मुद्देमाल जप्त केला होता.

.....